Tvískipt mynt­svæði innan ESB til umræðu

Frakkar og Þjóðverjar gætu ekki bjargað Spánverjum frá gjaldþroti

Evrópskur embættismaður hefur sagt The Daily Telegraph, að því fram kemur í blaðinu 19. júní, að á æðstu stöðum sé verið að kanna dramatískt framtíðarúrræði til að verja efnahag einstakra ríkja betur, þar sem þau ráði ekki við aðra fjármálakrísu á borð við þá, sem er í Grikklandi.

Hugmynd er um að mynda „efra-evru-svæði“, sem í upphafi næði til Frakklands, Þýskalands, Hollands, Danmerkur, Austurríkis og Finnlands. Ríki eins og Grikkland, Spánn, Ítalía, Portúgal og jafnvel Írland yrðu látin verða eftir á öðrum stað í efnahagstilverunni.

Embættismaðurinn sagði, að franskir og þýskir embættismenn hefðu fyrst varið nokkrum mánuðum til að skoða, hvernig ýta mætti þeim ríkjum, sem illa standa og illa stæðu sig út af evru-svæðinu, en komist að þeirri niðurstöðu, að það væri ekki æskilegt.

Tvískipt evru-svæði væri nú til skoðunar sem plan B. Þetta væri neyðarúrræði, þar sem valið stæði á milli hinna verstu kosta. Að aðstoða Grikkland væri tiltölulega ódýrt miðað við Spán, sem ríkin gætu ekki látið sigla sinn sjó en hefðu þó ekki mátt til að bjarga, ef í nauðir ræki. Auk þess væri ekki pólitískt fært að neyða Frakka og Þjóðverja til að bjarga öðrum þjóðum frá gjaldþroti.

Ein leið, til að verja ríkari löndin í norðurhluta Evrópu og aðstoða skuldsettu ríkin í suðurhlutanum,væri, að Þjóðverjar leiddu hóp ríkja út úr evrunni, eins og hún er núna, og inn á nýtt myntsvæði við hlið hins gamla.

Gamla evran mundi falla mikið gagnvart hinni nýju mynt undir forystu Þjóðverja og Frakka, en unnt yrði að vernda þjóðirnar í norður- og suðurhluta Evrópa. Í norðri yrðu þjóðirnar varðar gegn smitun af skuldasöfnun og í suðri þyrftu þjóðir ekki að horfast í augu við þá hörmung að verða varpað á dyr og neyddar til einangrunar.

Evrópski embættismaðurinn sagði, að Frakkar hefðu lánað 500 milljarða punda til Spánar og Þjóðverjar 335 milljarða punda. Á greiðslugetu Spánar reynir í september, þegar ríkið þarf að endurfjármagna 67 milljarða punda af erlendum skuldum sínum.

„Skuldavandi evru-svæðisins er langt frá því leystur,“ sagði háttsettur ESB-samningamaður. „Enginn veit, hvar þetta endar. Eitt er víst, að evru-svæðið breytist.“