ESB-viðskiptabann á selafurðir leiðir til lögbanns ESB-dómstólsins

Almenni ESB-dómstóllinn féllst fimmtudaginn 19. ágúst á ósk Inuit-samtaka um að setja lögbann á ákvörðun Evrópusambandsins um að banna viðskipti með selaafurðir innan ESB. Þrátt fyrir lögbannið tilkynnti framkvæmdastjórn ESB föstudaginn 20. ágúst, að viðskiptabannið væri í gildi, það næði þó ekki til þeirra, sem óskað hefðu eftir lögbanninu. Samtök Inuíta í Kanada og Grænlandi auk selveiðimanna í Noregi og annarra hagsmunaaðila stóðu að baki lögbannskröfunni.

Jan Bouckaert, lögmaður Inúíta sagði, að hann tryði því ekki, að lögbannsúrskurðurinn kæmi aðeins beiðendunum til góða, á meðan málið yrði til efnislegrar meðferðar hjá dómstólnum. Dómarar munu leggja mat á, hvort viðskiptabannið standist ESB-stofnskrár.

ESB-þingið kynnti á síðasta ári, að viðskiptabannið yrði sett. Kanadamenn gagnrýndu það harkalega og snerust meðal annars gegn áheyrnaraðild ESB að Norðurskautsráðinu vegna bannsins. Kanadastjórn hefur skotið banni ESB til Alþjóðaviðskiptastofnunarinnar og sakað ESB um fráleita mismunun gagnvart kanadískum selveiðimönnum, sem fylgi öllum alþjóðareglum við veiðar sínar.

Viðskiptabann ESB undanskilur afurðir frá þeim veiðimönnum, sem stunda hefðbundar veiðar innfæddra, Inúíta. Samtök þeira telja hagsmunum félagsmanna sinna engu að síður stefnt í voða, þar sem bannið þrengi markað fyrir afurðir þeirra.