Staða ESB-andstæðinga sterkari í ríkis­stjórn með tilkomu Ögmundar

Fari sem horfir um breytingar á ríkisstjórn er ljóst, að staða eindreginna andstæðinga ESB-aðildar innan Vinstri grænna styrkist mjög. Nú má telja víst, miðað við fréttir Morgunblaðsins og Fréttablaðsins í morgun og ljósvakamiðla í gærkvöldi, að Ögmundur Jónasson taki sæti í ríkisstjórn á ný og Álfheiður Ingadóttir hverfi úr ráðherraembætti. Álfheiður hefur verið í hópi ákveðnustu stuðningsmanna Steingríms J. Sigfússonar innan VG og í raun hafa því fjórir af fimm ráðherrum VG fylgt þeirri afstöðu fjármálaráðherra að sigla milli skers og báru vegna aðildarumsóknar Íslands. Jón Bjarnason, sjávarútvegs- og landbúnaðarráðherra hefur því verið einn á bát. Ef og þegar Ögmundur Jónason setzt við ríkisstjórnarborðið á ný verður staða þeirra tveggja sterkari.

Ögmundur Jónasson hefur að undanförnu sýnt í orði og verki, að andstaða hans við aðildarumsóknina hefur harðnað enda er hann bersýnilega sammála Jóni Bjarnasyni um, að um aðlögunarferli sé að ræða en ekki samningaviðræður.

Augljóst er að Samfylkingin fagnar því ekki að staða ESB-andstæðinga innan VG styrkist innan ríkisstjórnarinnar. Hins vegar er það vafalaust mat forystumanna Samfylkingar að taki Ögmundur Jónasson sæti á ný í ríkisstjórn skapist meiri friður innan þess arms þingflokks Vinstri grænna, sem fylgt hefur Ögmundi að málum.

Þá má telja líklegt að aðkoma Ögmundur Jónassonar að ríkisstjórn efli stöðu þeirra afla innan stjórnarflokkanna og þá sérstaklega VG, sem eru ekki tilbúin til að halda áfram viðræðum um Icesave við Breta og Hollendinga á óbreyttum forsendum.