Þögn um Icesave og ESB aðild í 20 mála verkefnaskrá ríkis­stjórnar­innar

Samtímis því, sem skipt var um ráðherra í ríkisstjórninni sendu forystumenn stjórnarflokkanna frá sér yfirlýsingu, þar sem segir meðal annars:

Ný ríkisstjórn Samfylkingar og Vinstrihreyfingarinnar - græns framboðs byggir störf sín og stefnu á skýrum markmiðum samstarfsyfirlýsingar flokkanna frá maí 2009, fyrirliggjandi efnahagsáætlun og samþykktum meirihlutans á Alþingi. Meðal þeirra stefnumála ríkisstjórnarinnar sem formenn stjórnarflokkanna eru sammála um að leggja áherslu á og hrinda í framkvæmd á næstu mánuðum eru eftirfarandi 20 mál.

Þegar þessi 20 mál eru skoðuð vekur athygli, að þar er hvorki minnst á Icesave né ESB-aðildina. Engin skýring hefur verið gefin á þögninni um þessi tvö mál, sem bæði hljóta að vera stórmál á verkefnalista ríkisstjórnarinnar, ef hún ætlar að framfylgja stefnu sinni um ESB-aðild og samninga um Icesave. Ber að skýra þögnina sem stefnubreytingu ríkisstjórnarinnar?