Nýjar áhyggjur af stöðu evrunnar og evru­svæðisins

Nýjar áhyggjur hafa vaknað um stöðu evrunnar og fjárhagsstöðu evrusvæðisins samkvæmt fréttum euobserver í morgun. Í gær lækkaði gengi evrunnar og ávöxtunarkrafa á skuldabréfum Grikklands, Írlands og Portúgals hækkaði mjög. Í tilviki Portúgals er ástæðan talin sú, að portúgalskir bankar hafa orðið að leita eftir miklu fjármagni hjá Seðlabanka Evrópu vegna þess, að þeir eiga í erfiðleikum með að fá það annars staðar.

Írar standa frammi fyrir miklum vanda vegna Anglo Irish Bank, eins og fram hefur komið hér á Evrópuvaktinni. Í síðustu viku kvaðst bankinn þurfa á að halda 25 milljörðum evra í nýju fé, sem nemur 19% af landsframleiðslu Írlands. Standard & Poor´s heldur því fram, að nær væri að tala um 35 milljarða evra.

Önnur ástæða fyrir versnandi stöðu á evrusvæðinu er talin vera frétt í Wall Street Journal þess efnis, að álagspróf evrópsku bankanna í júní hafi ekki gefið rétta mynd af stöðu þeirra.

Samkvæmt frétt í Irish Times í morgun þurfa Írar nú að borga 6,02% vexti af skuldabréfum sínum og munurinn á ávöxtunarkröfu á írskum skuldabréf og þýzkum er nú 380 punktar