Sígaunar valda deilum á ESB-þinginu

Ítalska lögreglan vinnur markvisst að því að rífa búðir Sígauna við Mílanó og Róm og flytja suma þeirra í bráðabirgðahúsnæði. ESB-þingmenn munu miðvikudaginn 8. september greiða atkvæði um það í Strassborg, hvort fordæma beri ákvörðun Nicolas Sarkozys, Frakklandsforseta, um að hefja brottflutning Sígauna frá Frakklandi undir pólitískum formerkjum með vísan til þess, að dvöl þeirra í Frakklandi ýti undir afbrot og glæpi.

Gianni Alemanno, borgarstjóri Rómar, segir, að niðurrifi Sígauna-búðanna verði hraðað. Lögregla muni rífa um 300 þeirra, þrjár til fjórar á viku, og flytja íbúana í 10 opinbera dvalarstaði.

Þriðjudaginn 7. september felldi lögregla skúra og tjöld um 250 Sígauna við Mílanó og hurfu íbúarnir á braut „án nokkurra vandræða“ að sögn lögreglunnar við AFP-fréttastofuna. 315 búðir Sígauna hafa verið rifnar við Mílanó síðan 2007. Riccardo De Corato, borgarstjóri, segir, að nú séu um 1.200 Sígaunar í Mílanó en þeir hafi verið 10.000 fyrir þremur árum.

Livia Jaroka, ESB-þingmaður frá Ungverjalandi, er eini Sígauninn á ESB-þinginu. Í ræðu, sem hún flutti þar 7. september, lagði hún áherslu á rétt ESB-borgara til frjálsrar farar en sagði þennan rétt „ekki skilyrðislausan“. Hún mótmælti því, að Sígaunar væru gerðir að pólitísku bitbeini. Finna yrði evrópska lausn á málum þeirra 12 milljóna manna, sem teljast Sígaunar í álfunni.

Jaroka er í mið-hægri þingflokknum á ESB-þinginu – EPP-flokknum, eins og fylgismenn Nicolas Sarkozys og Silvios Berlusconis, forsætisráðherra Ítalíu. Þingflokkurinn er hinn fjölmennasti á ESB-þinginu og hefur lagt fram eigin tillögu um málefni Sígauna, án þess að gagnrýna aðgerðir franskra stjórnvalda.