Prófessor við UCLA: Norðurslóðir segull framtíðar

Vefsíða UCLA

Laurence C. Smith, myndin er af vefsíðu UCLA, en hún er tekin á Íslandi.

Hlýnun jarðar leiðir til þess að borgir á norðurhveli jarðar, í Kanada og á Norðurlöndunum, fá stóraukið efnahagslegt gildi auk þess að draga til sín sífellt fleira fólk frá öðrum löndum. Þetta er mat Laurence C. Smiths, prófessors í landafræði, jarð- og geimvísindum við Kaliforníuháskóla í Los Angeles, UCLA.

Sagt er frá nýrri bók prófessorsins, The World in 2050: Four Forces Shaping Civilization's Northern Future, á vefsíðu UCLA, http://newsroom.ucla.edu/portal/ucla/global-warming-s-silver-lining-169919.aspx en hún kemur út 23. september.

Í bókinni færir Laurence C. Smith rök fyrir því, að strjálbýl landsvæði eins og í norðurhluta Bandaríkjanna, í Kanada, Grænlandi og Rússlandi muni verða „migration magnets“ eða draga að sér innflytjendur, þegar fjöldi fólks kýs að setjast að í nýjum miðstöðvum hnattræns valds „new centers of global power.“

Prófessorinn hóf athuganir sínar á norðurslóðum í því skyni að kanna landfræðileg áhrif loftslagsbreytinga. Áhugi hans vaknaði hins vegar ekki síður á þjóðfélagslegum og efnahagslegum breytingum.

Hann segir, að hlýnun jarðar hafi margvísleg áhrif á norðurslóðum. Nýjar siglingaleiðir opnist, flutningaskip geti farið stystu leið milli Atlatshafs og hafna í Asíu, nýjar lindir olíu og gass finnist, og þá muni hvers kyns jarðargróður aukast á norðlægum slóðum en standa í stað eða minnka annars staðar á jörðinni. Þá muni þjóðir á norðlægum slóðum ráða yfir miklum birgðum af fersku vatni, sem verði selt til annarra heimshluta.

Meðal þeirra borga, sem eigi eftir að vaxa og gegna enn meira hlutverki og hafa meiri áhrif á næstu 40 árum, nefnir Smith: Toronto, Montreal, Vancouver, Seattle, Calgary, Edmonton, Minneapolis-St.Paul og Ottawa í Kanada og Bandaríkjunum. Reykjavík, Kaupmannahöfn, Ósló, Stokkhólm og Helsinki á Norðurlöndunum og St. Pétursborg og Moskvu í Rússlandi.

Hann nefnir einnig 10 framtíðarhafnir, þar af séu þrjár helst kunnuglegar núna: Prudhoe Bay í Alaska, Churchill í Kanada og Reykjavík. Í hópinn muni bætast: Nuuk á Grænlandi; Hammerfest, Kirkenes og Tromsö í Noregi; og Archangelsk, Dudinka og Murmansk Í Rússlandi.

Smith talar um NORC löndin, það er „northern rim countries“ og ber stöðu þeirra saman við BIRC löndin (Brasilíu, Indland, Rússland og Kína). Telur hann, að sameiginlega muni NORC mynda fjórða stærsta efnahagsveldi heims, á eftir BRIC, ESB og Bandaríkjunum.