ESB-þingið ver dvöl Sígauna - Frakkar segjast hafa þingið að engu

ESB-þingið krafðist þess í ályktun sinni 9. september, að frönsk stjórnvöld hættu „tafarlaust“ að reka Sígauna úr landi. Eric Bresson, innflytjendaráðherra Frakka, sem sat fundi í Búkarest með fulltrúum rúmenskra stjórnvalda, sagði, að það „kæmi ekki til álita“ að orðið yrði við kröfu þingsins.

Eric Besson

Í ályktuninni, sem var samþykkt með 337 atkvæðum gegn 245, er lýst „miklum áhyggjum vegna aðgerða Frakklands og annarra aðildarlanda gegn Sígaunum og ferðamönnum.“

Án þess að nefna Þýskaland, en þaðan hafa Sígaunar verið reknir, eða Ítalíu, þar sem margar ólöglegar búðir Sígauna hafa verið jafnaðar við jörðu, er hvatt til þess, að „þessi yfirvöld hætti tafarlaust öllum brottvísunum Sígauna.“

Fjöldi þingmanna kom til atkvæðagreiðslunnar og sumir þeirra veifuðu borða með áletruninni: „Sama rétt fyrir alla“. Vinstri og miðflokkar stóðu að ályktuninni, sem samþykkt var, ásamt græningjum. Mið-hægrimenn og ESB-efahyggjumenn fluttu eigin tillögu, þar sem ekki var vikið beinum gagnrýnisorðum að Frökkum.

Í ályktuninni, sem var samþykkt, er lögð áhersla á rétt allra ESB-borgara og fjölskyldna þeirra til frjálsrar farar og búsetu hvarvetna innan ESB, þessi réttur sé grunnþáttur ESB-borgararéttar. Fjöldabrottvísanir standist ekki ESB-lög, þar sem þær jafngildi mismunun á grundvelli kynþáttar og uppruna. Þá lýsti þingið sérstökum áhyggjum yfir því, hve fjallað væri um þetta mál af miklum æsingi og niðrandi hætti í garð þeirra, sem hlut eiga að máli.

Franski ráðherrann Eric Besson sagði ESB-þingið hafa farið út fyrir valdmörk sín, og Frakkar myndu að sjálfsögðu ekki fara að pólitískri forskrift. „Ég vil segja það skýrt og greinilega, það kemur ekki til álita, að Frakkland hætti við að brottvísun til heimalands, hvort sem þeir eru Rúmenar, Búlgarar eða af einhverju öðru þjóðerni,“ sagði ráðherrann.

Frönsk stjórnvöld kölluðu yfir sig alþjóðlega gagnrýni í ágúst, þegar þau gáfu lögreglu fyrirmæli um að jafna ólögmætar búðir Sígauna við jörðu, eftir að franskir ferðamenn grípu til harkalegra mótmæla vegna reiði yfir skothríð lögreglu.

Sígaunum, sem fæddir eru í Frakklandi, var skipað að færa sig úr stað. Flogið var með hundruð Sígauna frá A-Evrópu til Rúmeníu og Búlgaríu.

Besson heldur því fram, að allar aðgerðir Frakka séu í fullu samræmi við ESB-lög. ESB-þingið ályktaði á hinn bóginn, að skortur á framfærslu geti alls ekki réttlætt sjálfkrafa brottvísun ESB-borgara. Þingið gagnrýndi framkvæmdastjórn ESB fyrir seinlæti og takmörkuð viðbrögð.

Thomas Hammarberg, mannréttindastjóri Evrópuráðsins, gagnrýndi Frakkland harkalega miðvikudaginn 8. september og sagði málflutninginn minna á framgöngu ríkisstjórna nasista og fasista.

Frönsk stjórnvöld brugðust harkalega við orðum Hammarbergs, sem sagði, að hann hefði ekki beint orðum sínum að frönsku ríkisstjórninni.