ESB ætlar að verja 217 milljónum króna í kynningu vegna ESB-aðildar

Til að stunda upplýsingamiðlun í þágu ESB og aðildar Íslands að sambandinu ætlar ESB að verja 1,4 milljónum evra, 217 milljónum króna á næstu tveimur árum. Framkvæmdastjórn ESB hefur verið auglýst eftir verktaka og á að skila inn tilboðum í síðasta lagi 15. október. Viku síðar, 22. október, er gert ráð fyrir, að ESB komist að niðurstöðu, upplýsingamiðlunin hefjist 1. janúar, 2011.

Í lauslegri þýðingu sækist ESB eftir samstarfsaðila til að sinna eftirfarandi samningsbundnu verkefni:

Tilgangur samningsins er fyrst og fremst að aðstoða Evrópusambandið við að bæta almenna þekkingu og skilning Íslendinga á Evrópusambandinu og við að skýra út tengslin milli Íslands og ESB, aðlögunarferlið að ESB og hugsanleg áhrif aðildar á Ísland og íbúa þess.

Störf verðandi verktaka eiga að auðvelda umræður um alla ofangreinda þætti og miða að því að snúast gegn rangfærslum og villandi upplýsingum um ESB, og stuðla þannig að því að veita vel upplýstum borgurum með raunsæjar væntingar grunn til að komast að eigin niðurstöðum.

Til að ná þessu markmiði verður verktakinn að tryggja miðlun og aukið aðgengi að hlutlægum, skýrum og gagnlegum upplýsingum um ESB, undir forsjá framkvæmastjórnar ESB, svo að gagnist öllum stigum íslensks þjóðfélags, að hluta með því að koma á fót og reka upplýsingamiðstöð ESB.

Verktakinn skal aðstoða stækkunarskrifstofu framkvæmdastjórnar ESB og sendiskrifstofu ESB í Reykjavík við að framkvæma upplýsingastefnu framkvæmdastjórnarinnar og einnig við að semja upplýsingaáætlun til nokkurra ára á, sem nýtist netinu og við annars konar miðlun. Skal áætlunin gera ráð fyrir miðlun upplýsinga, stjórn viðburða, útgáfu upplýsingatexta og dreifingu, samskiptum við fjölmiðla og ráðgjöf, fyrir utan að koma á fót og stjórna upplýsingamiðstöð ESB.