Alvarlegasta hryðjuverkaviðvörun Bandaríkja­stjórnar frá 2001

Viðvörun Bandaríkjastjórnar um hættu á hryðjuverkaárás í Evrópu er alvarlegasta viðvörun um þetta efni frá árinu 2001 að mati sérfræðings, sem telur hana benda til þess, að Bandaríkjamenn telji sig ekki hafa vald á ástandinu. Í tilkynningu bandaríska utanríkisráðuneytisins segir, að al-Kaída standi að baki þeim aðgerðum, sem ástæða sé til að óttast.

Magnus Ranstorp, sænskur sérfræðingur, sem rannsakað hefur eðli og þróun hryðjuverka, segir í Berlingske Tidende, að alvarlegar vísbendingar hljóti að vera að baki bandarísku viðvöruninni sunnudaginn 3. október. Hann segir:

„Það er mjög óvenjulegt, að Bandaríkjastjórn sendi frá sér slíka viðvörun til bandarískra ríkisborgara. Það hlýtur að byggjast á því, að hún hafi upplýsingar um óeðlileg atvik og telji sig ekki hafa stjórn á ástandinu. Þetta er alvarlegasta hryðjuverkaviðvörun, sem Bandaríkjastjórn hefur sent frá sér síðan 2001.“

Á föstudag hækkaði sænska öryggislögreglan Säpo viðvörunarstig vegna hættu á hryðjuverkaárás í landinu með vísan til almenns mats um „aukinn vilja og ásetning um að fremja afbrot.“ Danska leyniþjónustan, PET, hefur ekki breytt hættumati sínu. Magnus Ranstorp telur, að það sýni, að PET hafi stjórn á ástandinu.

„Staðan getur breyst á skjótan hátt, en samkvæmt tilkynningum frá Bandaríkjunum steðjar nú mesta ógn að Bretlandi, Frakklandi og Þýskalandi. Það þýðir hins vegar ekki, að ekki kunni að verða ráðist á skotmörk í Danmörku. Um er að ræða hryðjuverkahótun gegn stærstum hluta Evrópu,“ segir Magnus Ranstorp í Berlingske Tidende.

Þrátt fyrir allt telur Ranstorp þó litla hættu á meiriháttar hryðjuverkaárás í Evrópu og ástæðulaust sé fyrir Evrópubúa að hræðast. Hann segir:

„Aðgæsla er ágæt, en ekki ótti. Áhyggjur mínar snúast ekki aðeins um, hvort einhverjum takist að vinna meiriháttar hryðjuverk í Evrópu, heldur hver viðbrögð okkar verða, kæmi til þeirra. Hætta er á því, að viðbrögðin verði of sterk og grípa til of mikils eftirlits og öryggisráðstafana . Um það snýst framtíðarhræðsla mín.“

Breska utanríkisráðuneytið sendi frá sér viðvaranir sunnudaginn 3. október til fólks í Frakklandi og Þýskalandi. Breskum borgurum var bent á, að hryðjuverkahætta væri mikil í löndunum.