Kjarnorkuslysið í Japan veldur pólitískum vandræðum fyrir Merkel

Ríkisstjórn Angelu Merkel í Þýskalandi ákvað mánudaginn 14. mars að taka sér þriggja mánaða umþóttunartíma til að íhuga fyrri ákvörðun um að framlengja starfstíma 17 kjarnorkuvera í Þýskalandi um 12 ár. Með þessu brást ríkisstjórnin við slysinu í Fukushima –kjarnorkuverinu í Japan sem valdið hefur ótta í Þýskalandi og víðar í Evrópu.

Guido Westerwelle, utanríkisráðherra, og Angela Merkel, kanslari, tilkynna að þau ætli að íhuga líf kjarnorkuvera.

Hinn 27. mars verður kosið til tveggja sambandslandsþinga það er í Baden-Württemberg og Reihnland-Pfalz.

Þýsku blöðin fjölluðu um áhrif kjarnorkuslyssins í Japan í leiðurum sínum 14. mars. Hér er vitnað til tveggja þeirra.

Süddeutsche Zeitung (til vinstri) segir:

„Atburðirnir í Japan sem geta ekki verið fjarlægari Þýskalandi landfræðilega munu hafa pólitísk áhrif hér á landi. Þeir gætu fljótlega tekið að breyta því hvernig meirihlutar myndast og aukið enn á erfiðleka mið-hægri samsteypustjórnarinnar. Ákvörðunin sem hún tók um kjarnorku í september 2010 gæti leitt til falls hennar.

Fátt höfðar jafn sterkt til tilfinninga fólks og vekur hjá því jafn mikla þörf til að láta að sér kveða í stjórnmálum og kjarnorka. Það eru ekki gleðifréttir fyrir ríkisstjórn sem styður starfrækslu kjarnorkuvera. Einkum þegar mikilvægar sambandslandakosningar eru á næsta leiti. Þær raska ekki valdajafnvægi á landsvísu en geta auðveldlega haft áhrif á baráttuþrek flokksstarfsmanna til að viðhalda því valdi.

Þær eru ekki gleðifréttir vegna þess að til dæmis í Baden-Württemberg velta kosningaúrslit á aðeins fáeinum prósentum. Efasemdir meðal stuðningsmanna kristilegra eða frjálslyndra gætu leitt til þess að þúsundir kjósenda sætu heima – eða flyttu þá í fang mið-vinstri flokkanna.

Merkel gæti varla orðið fyrir stærra áfalli núna en að kristilegir töpuðu forystu sinni í Baden-Württemberg.“

Die Welt (til hægri) segir:

„Jarðskjálftinn 11. mars var ekki árás hryðjuverkamanna. Pólitísk og sálræn áhrif hans verða eins mikil og 9/11 af því að hann hefur sýnt til hvers hryðjuverkaárás á kjarnorkuver kynni að leiða.

Myndir sem sýna brennandi byggingar fuðra upp vekja sterk viðbrögð, en kjarnorkan gjörbreytir stöðunni. Höggbylgjan sem barst frá Fukushima kann sjálf að hafa fundist í allt að þriggja kílómetra fjarlægð. Sálrænu áhrifin bárust hins vegar um alla heimsbyggðina.

Tjsernobýl var sérmál. Menn litu kjarnorku grunsemdaraugum en féllust á nýtingu hennar svo framarlega sem nútíma lýðræðisríki beittu öryggisráðstöfunum við vinnsluna.

Þessi tími er liðinn. Trú á margþættum og sannreyndum öryggisráðstöfunum varð að engu í Fukushima. Í hinu hátæknilega lýðræðisríki Japan hefur komið í ljós hvað gæti gerst yrði gerð net-árás á þýskt eða franskt kjarnorkuver eins og raunar kom í ljós þegar „Stuxnet“-forritinu var beitt gegn kjarnorkuáætlun Írans. Eða ef einbeittur, tæknivæddur hryðjuverkahópur næði orkuveri á sitt vald. Menn gátu sagt sér þetta. Að sjá það olli þáttaskilum.“