700 milljarða evra varanlegur neyðar­sjóður ESB

Leiðtogafundur Evrópusambandsins í Brussel, sem hófst í gær og lýkur í dag er kominn að niðurstöðu um framtíðarskipulag neyðarsjóðs. Settur verður á stofn varanlegur sjóður, sem heitir á ensku European Stability Mechanism og hefur það hlutverk að veita aðstoð til aðildarríkja evrunnar, sem lenda í vandræðum. Gert er ráð fyrir að sjóðurinn ráði yfir um 700 milljörðum evra. Evruríkin eiga að greiða 80 milljarða evra í sjóðinn með fimm afborgunum á fimm árum. Að auki munu þau veita sjóðnum tryggingar, sem nema 620 milljörðum evra.

Samkvæmt fréttum BBC kom neyðaraðstoð við Portúgal ekki til umræðu. Portúgalar halda fast við að þeir ætli ekki að leita eftir slíkri aðstoð.

Hinn nýi sjóður (ESM) tekur við hlutverki hins tímabundna neyðarsjóðs ESB, sem kallaður hefur verið European Financial Stability Facility (EFSF) á árinu 2013. Ákvörðun um að auka lánagetu sjóðsins hefur verið frestað fram í júní að ósk Finna en kosningar fara fram í Finnlandi 17. apríl n.k.

Fyrir tveimur vikum náðu leiðtogar evruríkjanna samkomulagi um sérstakan efnahagsmálapakka, sem gengur undir nafninu evrusáttmálinn eða á ensku „euro-plus-pact“ eftir að sex ESB-ríki, sem ekki hafa tekið upp evru samþykktu að undirrita hann en það eru Danmörk, Pólland, Lettland, Litháen, Búlgaría og Rúmenía.