„Við viljum opna faðminn,“segir Ögmundur um nýja útlendinga­stefnu ríkis­stjórnar­innar

„Við viljum opna faðminn,“ sagði Ögmundur Jónasson, innanríkisráðherra, í Kastljósi 9. maí, þegar rætt var við hann um hælisleitendur á Íslandi og reglur sem gilda um afgreiðslu hælismála. Hann sagði að horfið yrði frá „lagahyggju og vinnumarkaðshyggju“ og mál einstaklinga yrðu afgreidd með tilliti til mannúðar og félagslegra sjónarmiða.

Innanríkisráðherra taldi öfugsnúið að í samræmi við EES-aðild hefðu menn heimild til að vera hér í hópum í „glæpsamlegum tilgangi“ en friðsamlegir útlendingar utan EES-svæðisins fengju ekki að setjast að hér á landi.

Ögmundur taldi að endurskoða yrði allt „regluverk“ varðandi útlendinga til að unnt yrði að taka hér á móti „góðu heiðvirðu“ fólki, sem væri að „flýja dapran heim“.

Þegar Þóra Arnórsdóttir, spyrjandi Kastljóss, vildi vita hve langt Ögmundur vildi ganga við að afnema hindranir í þágu innflytjenda svaraði hann á þann veg að þetta væri „flókinn veruleiki“. Huga þyrfti að því að sliga ekki „velferðarkerfið“ þótt opnað væri fyrir „fátæku fólki“. Hann vitnaði til reynslu sænskra hægri manna í þessu sambandi.

Ögmundur sagði: „Við viljum opna faðminn gagnvart góðu, heiðvirðu fólki.“ Mannúð og félagsleg sjónarmið ættu að ráða, stefnt yrði að því að „losna“ við annars konar fólk. Nú yrðu settar reglur til að skoða mætti á annan og nýjan hátt fólk á flótta undan „nöprum veruleika“, þótt jafnframt yrði að hafa í huga að sumir reyndu að villa á sér heimildir.

Innanríkisráðherra taldi að allir væru „meðvitaðir“ um að reglum um útlendinga og innflytjendur yrði að breyta á þann veg sem hann lýsti.