Merkel vill „umtalsverðan skerf“ frá fjárfestum til björgunar Grikkjum - Juncker talar um leik að eldi

Angela Merkel, kanslari Þýskalands, hvatti fjárfesta til að leggja „umtalsverðan“ skerf af mörkum til að draga úr skuldavanda Grikkja í ræðu sem hún flutti á fundi með flokksmönnum sínum, kristilegum demókrötum, í Berlín laugardaginn 18. júní.

„Við verðum að leggja okkur fram um að fá umtalsvert framlag“ frá fjárfestum og lánardrottnum eins og bönkum og tryggingarfélögum sagði Merkel og tók fram að framlagið yrði að verða veitt af fúsum og frjálsum vilja.

Wolfgang Schäuble, fjármálaráðherra Þýskalands, talaði á sama veg og Merkel í samtali við Börsenzeitung laugardaginn 18. júní og sagði að hlutverk fjárfesta ætti að vera „merkjanleg“ og „tryggt“.

Á fundi með Nicolas Sarkozy, forseta Frakklands, í Berlín föstudaginn 17. júní féll Merkel frá fyrri kröfu um að framlag fjárfesta vegna annars neyðarláns til Grikkja næmi allt að þriðjungi þess fjár sem vantaði og skyldu þeir lengja endurgreiðslutíma á grískum skuldabréfum sínum.

Merkel og Sarkozy lögðu áherslu á að fjárfestar ættu sjálfir að ákveða framlag sitt og skyldu hafa samráð um það við Seðlabanka Evrópu, framkvæmdastjórn ESB og Alþjóðagjaldeyrissjóðnum.

Orð Merkel laugardaginn 18. júní féllu um svipað leyti og Jean-Claude Juncker, forsætisráðherra Lúxemborgar og formaður ráðherraráðs evru-landanna 17, sagði að afleiðingar skuldavanda Grikkja kynnu að breiðast til annarra ESB-ríkja eins og eldur í sinu.

Juncker fullyrti að vandinn sem neyddi Grikki, Íra og Portúgali til að leita aðstoðar kynni ekki aðeins að hafa áhrif á Spáni, sem almennt er talinn næstur í röðinni, heldur einnig Ítalíu og Belgíu.

Í viðtali við Süddeutsche Zeitung gagnrýndi Juncker þýsk stjórnvöld fyrir að þrýsta á skuldabréfaeigendur og sagði að með því hefðu þau aukið kostnaðinn við að koma Grikkjum úr skuldakreppunni. Hann sagði að innan evru-svæðisins léku menn sér að eldi.

Fjölmenn mótmæli eru í Grikklandi dag eftir dag.