AGS: enn „umtalsverður“ efnahagsvandi á Spáni

Spánverjar standa enn frammi fyrir „umtalsverðum“ efnahagsvanda segir í nýrri árlegri skýrslu Alþjóðagjaldeyrissjóðsins (AGS). Spænska ríkisstjórnin verði enn að leggja áherslu á niðurskurð opinberra útgjalda og leiðir til að skapa meira frelsi á vinnumarkaði.

Stjórnvöld í Madrid hafa allt undanfarið ár unnið að opinberum sparnaði í því skyni að minnka skuldir ríkisins. Þau hafa þó ekki óskað eftir neyðarláni eins og Grikkir og Portúgalir.

Í skýrslu AGS segir ekkert um hvort Spánverjar þurfi á slíku láni að halda en á hinn bóginn er varað við því að efnahagsvandinn á evru-svæðinu kunni enn að aukast og það gæti aukið lánakostnað spænska ríkisins og banka á Spáni.

Með hliðsjón af þessu telur AGS að ekki megi „slaka á neinu varðandi umbætur“ til að ýta undir hagvöxt á Spáni og draga úr áhyggjum á fjármálamörkuðum. AGS segir að atvinnuleysi á Spáni, 21% og hið mesta í Evrópu – sé „óviðunandi hátt“.

Spænska ríkisstjórnin vinnur að breytingum á atvinnulöggjöf landsins til að draga úr atvinnuleysi. Hún vonar að með því verði fyrirtæki hvött til að ráða nýtt fólk til starfa en til þessa hefur verið mjög erfitt fyrir spænsk atvinnurekendur að segja upp starfsfólki.

Þrátt fyrir viðvörunarorð telur AGS að spænsk stjórnvöld séu enn á réttri braut varðandi lækkun ríkissjóðshalla úr 9,2% árið 2010 í 6% á þessu ári.