Ákærur á hendur Strauss-Kahn vegna hömlulausrar kvensemi valda frönskum sósíalistum vanda

Francois Hollande, fyrrverandi leiðtogi franskra sósíalista sem sækist nú eftir að verða forsetaframbjóðandi þeirra, hefur verið yfirheyrður af frönsku lögreglunni sem rannsakar ásakanir um tilraun til nauðgunar af hálfu Dominque Strauss-Kahn, fyrrverandi forstjóra Alþjóðagjaldeyrissjóðsins.

Anne Mansouret

Lögreglan vill vita hvort Hollande vissi um ásakanir Tristane Banon, blaðakonu og rithöfundar, í garð Strauss-Kahn árið 2003. Hún segist hafa farið heim til hans í því skyni að taka við hann blaðaviðtal en þá hafi hann ráðist á sig og gert tilraun til að nauðga sér. Hollande var leiðtogi sósíalista á þessu ári.

Strauss-Kahn neitar að hafa ráðist á Banon. Hann neitar einnig að hafa ráðist á hótelþernu í New York 14. maí sl. og reynt að nauðga henni. Banon lagði kæru sína fram eftir kæru á hendur Strauss-Kahn í New York.

Franska lögreglan hefur yfirheyrt nokkra einstaklinga vegna kærunnar frá Banon undanfarna daga. Efni yfirheyrslanna hefur í stórum dráttum verið lekið til fjölmiðla.

Anne Mansouret (65 ára), móðir Tristane Banon, hefur skýrt frá því að hún hafi einu sinni átt samræði við Strauss-Kahn. Það hafi gerst í höfuðstöðvum OECD í París og verið „óskemmtileg lífsreynsla“ að sögn hennar í samtali við franska vikuritið L‘Express.

„Hann tók mig með afli hermanns,“ segir Anne Mansouret í viðtalinu. Hún er formaður í svæðisfélagi franska sósíalistaflokksins og þekkt meðal franskra femínista. Þegar þetta gerðist starfaði Strauss-Kahn, þá 53 ára, sem sérlegur ráðgjafi hjá OECD.

Mansouret geymdi atvikið hjá sér þar til þremur árum síðar þegar dóttir hennar sagði henni frá reynslu sinni af því að hafa hitt Strauss-Kahn. Við svo búið gekk Mansouret strax á fund Brigitte Guillemette, fyrrverandi eiginkonu Strauss-Kahn, sem að sögn Mansouret hermdi atburðinn upp á fyrrverandi eiginmann sinn. Hann svaraði að sögn Mansouret: „Ég veit ekki hvað kom yfir mig. Ég rekkjaði með móður hennar, ég missti stjórn á mér þegar ég hitti dótturina.“

Mæðgurnar létu þar við sitja á þessum tíma af ótta við að frekari aðgerðir af þeirra hálfu myndu spilla fyrir pólitískum frama móðurinnar meðal sósíalista þar sem Strauss-Kahn var áhrifamaður.

Við yfirheyrslur nú segist Francois Hollande ekki vita neitt um mál Benon annað en óljósan orðróm. Hann varaði við því að málið yrði misnotað í pólitískum tilgangi.

Fréttaritari BBC í París segir að hvað sem staðreyndum málsins líði sé það frönskum sósíalistum til hinna mestu vandræða og hneisu og hafi þeir þó ekki jafnað sig á áfallinu sem þeir fengu vegna áskana á hendur Strauss-Kahn í New York.