ESB tekur að nýju upp þráðinn í umræðum um net­eftirlit

Innan framkvæmdastjórnar ESB í Brussel búa menn sig undir að taka upp þráðinn að nýju í umræðum um eftirlit með færslum á netið í því skyni að draga úr líkum á ódæðisverkum illvirkja á borð við Anders Behring Breivik sem handtekinn hefur verið í Noregi vegna sprengjutilræðis og fjöldamorða.

Michele Cercone, talsmaður framkvæmdastjórnarinnar, segir að embættismenn ESB hafi áhuga á að koma á fót upplýsingamiðstöð „þar sem fylgst er með vaxandi öfgum í umræðum á netinu“. Breivek setti 1.500 blaðsíðna stefnuyfirlýsingu inn á netið fyrir ódæði sitt þar sem hann lýsti þeirri banvænu hugmyndafræði sem hann fylgdi.

Í september 2010 lagði framkvæmdastjórn ESB fram tillögu um hert eftirlit með þeim netsíðum þar sem auglýst eru efni sem hugsanlega má nota til að framleiða sprengjur með efnum til landbúnaðarframleiðslu. Breivik notaði einmitt slík efni í sprengju sína.

Tillagan náði ekki fram að ganga þar sem einstök ríki vildu ekki leggja fram persónuupplýsingar um netnotendur í löndum sínum.

„Atburðirnir í Noregi verða vafalaust til þess að málið verður tekið upp að nýju, aðstæður hafa breyst,“ segir talsmaður framkvæmdastjórnarinnar.

Til marks um ný viðhorf má nefna að José Luis Zapatero, forsætisráðherra Spánar, hafði orð á því 25. júlí að hann „biði pólitískra aðgerða af hálfu ESB“ eftir illvirkið í Ósló. Cécilia Malmström, innanríkismálastjóri ESB, er í sambandi við Knut Storberget, dómsmálaráðherra Noregs, en ekki er vitað hvað þeim hefur farið í milli.

Heimild: EurActiv.fr