Jens Stoltenberg: „22. júlí nefnd“ mun rannsaka alla þætti ódæðisverkanna

Jens Stoltenberg, forsætisráðherra Noregs, segir að skipuð verði „22. júlí nefnd“ til að rannsaka sprengjutilræðið föstudaginn 22. júlí og fjöldamorðin. Hann segir að allir stjórnmálaflokkar hafi samþykkt skipun nefndarinnar sem muni grandskoða alla þætti málsins.

Jens Stoltenberg, forsætisráðherra Noregs, á blaðamannafundir 27. júlí. Á myndinni eru auk hans leiðtogar allra norsku stjórnmálaflokkanna.

Þetta kom fram á blaðamannafundi Stoltenbergs miðvikudaginn 27. júlí en spurningar hafa vaknað um þann tíma sem það tók lögregluyfirvöld að bregðast við og senda menn til Úteyjar þar sem Anders Behring Breivik skaut á félaga í ungliðahreyfingu Verkamannaflokksins, flokks Stoltenbergs.

Miðvikudaginn 27. júlí birti lögregla nöfn 13 þeirra sem féllu í Úteyju, tíu voru undir tvítugu og hinn yngsti 14 ára. Fyrstu fjögur nöfn látinna voru birt þriðjudag 26. júlí.

Um nefndina sagði Stoltenberg að hún yrði sjálfstæð og af skýrslu hennar mætti síðan draga lærdóm: „Þetta er ekki rannsókn vegna gagnrýni, við berum mikla virðingu fyrir því hvernig yfirvöld og ólíkar stofnanir hafa staðið að verki,“ sagði hann. „Við teljum hins vegar mikilvægt að farið sé í saumana á öllu sem hefur gerst svo að við getum lært eins mikið af því og kostur er og nýtt reynslu okkar.“

John Brain, fréttaritari BBC í Ósló, segir að heildarviðbrögð lögreglu hafi sætt gagnrýni og spurt hafi verið hvers vegna þau tóku svo langan tíma og hvers vegna ekki hafi verið unnt að nota þyrlu til að flytja lögreglu hraðar út í eyjuna.

Talsmaður samtaka lögreglumanna skýrði frá því að stjórnvöld hefðu ákveðið 20 milljón NKR (rúmlega 400 m ISK) aukafjárveitingu til lögreglunnar sem gerði kleift að ráða 100 nýja lögreglumenn á þeim svæðum þar sem reynt hefur á þá vegna árásanna.

Forsætisráðherrann tilkynnti einnig að minnisvarði yrði reistur í minningu hinna látnu og ríkisstjórnin mundi standa undir útfararkostnaði fórnarlambanna. Þá ættu ættingjar og fórnarlömb einnig rétt á bótum frá ríkinu samkvæmt nýjum lögum um bætur til fórnarlamba glæpamanna.