Pólverjar, Ungverjar og Tékkar ekki á neinni hraðferð inn á evru-svæðið

Pólverjar, Ungverjar og Tékkar eru ekki á neinni hraðferð inn á evru-svæðið þótt þeim beri að taka upp evru samkvæmt ESB-aðildarsamningum sínum frá 2004. Forsætisráðherrar landanna lýstu þessu yfir föstudaginn 14. október.

Visegrad-löndin: Pólland, Tékkland, Slóvakía og Ungverjaland.

„Myntbandalagið breytist smátt og smátt í millifærslu- og skuldabandalag, við verðum þess vegna að bíða og sjá hvert stefnan verður tekin næst á evru-svæðinu,“ sagði Petr Necas, forsætisráðherra Tékklands eftir fund í Prag með starfsbræðrum sínum Viktor Orban frá Ungverjalandi og Donald Tusk frá Póllandi.

Ráðherrarnir töldu að vandinn á evru-svæðinu skapaði hættu fyrir efnahagslíf landa sinna þar sem ríkin á svæðinu væru helstu viðskiptalönd þeirra.

„Ríkisstjórn mín hefur ekki og mun ekki ákveða neina dagsetning um upptöku evru,“ sagði Necas en núverandi kjörtímabili lýkur 2014 í Tékklandi.

Donald Tusk sagði að Pólverjar, sem nú eru í forsæti innan ESB, hefðu áhuga á að taka upp evru en þeir fullnægðu ekki enn skilyrðum til þess. „Hins vegar verður evru-svæðið einnig að fullnægja settum skilyrðum,“ sagði Tusk og bætti við: „Framtíð evru-svæðisins er í húfi ekki vegna þeirra sem eiga að fara þar inn heldur vegna evru-ríkja sem hafa skapað þetta hættulega ástand með framgöngu sem einkennist ekki alltaf af ábyrgðarkennd.“

Viktor Orban varaði við þrepskiptu Evrópusambandið og hvatti evru-ríkin 17 til að taka ákvarðanir sem yrði fagnað af ríkjum utan hópsins. „Það má ekki skipta ESB á milli evru-ríkjanna og hinna sem ekki hafa evru,“ sagði Orban.

Forsætisráðherrarnir hittust í Prag undir merkjum Visegrad-hópsins, það er fjögurra ríkja sem áður lutu stjórn kommúnista í miðhluta Evrópu, auk fyrrnefndu ríkjanna þriggja er Slóvakía, evru-ríki síðan 2009, einnig í hópnum.

Iveta Radicova, fráfarandi forsætisráðherra Slóvakíu, sat ekki fundinn þar sem ríkisstjórn hennar baðst lausnar um miðja vikuna vegna ágreinings um neyðarsjóð vegna evru-vandans.