Grikkland:Papandreou á fund forseta um hádegi-þingkosningar í febrúar?

Papandreou, forsætisráðherra Grikklands gengur á fund forseta Grikklands um hádegisbilið í dag eftir að hafa unnið atkvæðagreiðslu í gríska þinginu seint i gærkvöldi um vantraust á ríkisstjórnina. Papandreou og stjórn hans fengu 153 atkvæði en 145 greiddu atkvæði með vantrausti. Gert er ráð fyrir að Papandreou ræði við forseta um myndun samsteypustjórnar fleiri flokka. Heimildir Reuters fréttastofunnar segja, að hugsanlega muni Evangelos Venizelos, núverandi fjármálaráðherra mynda breiðari ríkisstjórn með aðild LAOS, flokks, sem er yzt til hægri og annars mið-hægri flokks. Hins vegar verður Nýi lýðræðisflokkur Samaras ekki aðili að slíkri stjórn. Hann lýsti hins vegar stuðningi við samkomulagið við ESB/AGS/Seðlabanka Evrópu, sem var forsenda þess að Papandreou féll frá þjóðaratkvæðagreiðslu.

Ekathimerini segir að Samaras hafi krafizt þess að Papandreou segði þegar í stað af sér og hefði ekki forystu um myndun nýrrar ríkisstjórnar, þótt undir forsæti annars manns væri. Þeirri kröfu hafi Papandreou hafnað og þess vegna verði Samaras ekki með í nýrri stjórn.

Venizelos hefur gefið til kynna að slík stjórn mundi efna til þingkosninga í febrúar.

Papandreou sagði í þinginu í gær, að það síðasta, sem hann hugsaði um væri embætti sitt. Honum væri alveg sama, þótt hann yrði ekki endurkjörinn. Hann hefði aldrei litið á pólitík sem atvinnu.

Nýrri samsteypustjórn er ætlað að tryggja framgang samkomulagsins við ESB/AGS/Seðlabanka Evrópu

Schröder, fyrrverandi kanslari Þýzkalands hefur komið Papandreou til stuðnings og sagt að það hafi ekki verið gert nóg til þess að hjálpa Grikkjum til að koma fótunum undir sig á ný. Hann gagnrýnir hægri menn í öðrum Evrópuríkjum og segir að þeir hafi ekkert gert til þess að þrýsta á Samaras um að styðja samkomulagið. Þetta kemur fram á Ekathimerini.