Barroso gengur gegn Þjóðverjum - þýskt skulda­bréfaútboð misheppnast

José Manuel Barroso, forseti framkvæmdastjórnar ESB, hefur kynnt áform um evru-skuldabréf þrátt fyrir andstöðu Þjóðverja. Framkvæmdastjórnin ætlar að hefja samráðsfundi til að kanna viðhorf ríkisstjórna evru-ríkjanna 17 til útgáfu slíkra skuldabréfa. Hann kallar þau „stöðugleika bréf“.

Margir óttast að skuldavandinn á evru-svæðinu sé hafi nú breiðst út til Þýskalands, eimreiðarinnar í efnhagslífi svæðisins, en þýska ríkið seldi skuldabréf fyrir 3,6 milljarða evra miðvikudaginn 23. nóvember af 6 milljarða útboði. Evran lækkaði snarlega eftir útboðið. Sérfræðingar notuðu orðið „hrikalegt“ þegar þeir lýstu niðurstöðu útboðsins.

Chris Walker, gjaldmiðlafræðingur hjá svissneska UBS-bankanum, sagði við BBC: „Margir hafa haft á orði undanfarna daga að ef til vill sé Þýskaland ekki hið örugga skjól sem flestir álíta.“

Jens Peter Sörensen hjá Danske Bank sagði að útboðið „endurspeglaði mikla vantrú á evrunni frekar en menn vantreystu þýskum ríkisskuldabréfum“.

Kæmu „stöðugleika bréf“ Barrosos til sögunnar segir BBC að því fylgdi mun meira eftirlit og stjórn af hálfu ESB á fjárlagagerð ríkja innan evru-svæðisins til að hindra að allt færi úr böndunum eins og gerst hefur undanfarin misseri.

Barrsoso sagði:

„Stöðugleika bréf leysa ekki úr bráðavandanum og koma ekki í stað nauðsynlegra umbóta í þeim ríkjum sem nú eru undir þrýstingi. Við þurfum jafnframt að sýna almenningi og alþjóðlegum fjárfestum að við meinum það sem við segjum um öflugri efnahagsstjórn á evru-svæðinu, bæði að því er varðar aga og samruna, stöðugleika bréfin eru einmitt til marks um viðleitni í þá átt.“

Angela Merkel Þýskalandskanslari hefur sagt að brýnna sé að breyta sáttmála ESB en gefa út evru-skuldabréf vilji menn leysa skuldavandann.

Wolfgang Schäuble, fjármálaráðherra Þýskalands, hefur sagt að evru-skuldabréf leysi ekki evru-skuldavandann og þau muni aðeins draga úr þrýstingi á ríki sem verði að takast á við skuldir sínar.

„Málið snýst um að skapa reglur um fjárlagaaga í Evrópuríkjum. Um leið og menn fara að tala um evru-skuldabréf er pressan tekin af þessum ríkjum,“ sagði fjármálaráðherrann.

ESB vill fá vald til að senda eftirlits- og tilsjónarmenn inn í fjármálaráðuneyti evru-ríkjanna og þeir hafi umboð til að krefjast breytinga sem þeir telja nauðsynlegar til að bjarga ríkjum undan efnahagshruni.

Um leið og framkvæmdastjórn ESB boðar aga og hertar reglur í Brussel berast fréttir af því að ríkissjóður heimamanna í Belgíu sé svo aðþrengdur að hann hafi ekki bolmagn til að leggja það af mörkum til að bjarga belgísk-franska Dexia-bankanum sem lofað hafði verið. Þetta muni skapa Frökkum vanda og fjármálaráðuneyti þeirra sem berst dag og nótt við að halda í AAA lánshæfiseinkunnina.