Frakkar og Þjóðverjar stefna að því að mynda „fjárlaga­samband“ evru-ríkja

Við afgreiðslu þýska þingsins á fjárlögum ársins 2012 snerust umræður meira um evru-skuldabréf og skyldur Þjóðverja gagnvart öðrum evru-þjóðum en útgjöld á heimavelli.

Þýska þinghúsið.

Þjóðverjar og Frakkar stefna að „fjárlagasambandi“. Þetta hugtak kom nýlega fyrir í ræðu Angelu Merkel kanslara þegar hún vildi lýsa því sem mestu skipti fyrir evru-svæðið. Hugtakinu er ætlað lýsa myntbandalagi með samræmdri fjárlagastefnu og strangri framkvæmd fjárlaga í öllum aðildarríkjunum.

Í þingumræðunum í vikunni sagði Merkel jafnframt að nauðsynlegt væri að samræma réttindi launþega, eftirlaunaaldur og skattareglur. Í því samhengi sagði hún að Frakkar og Þjóðverjar stefndu að sameiginlegum fyrirtækjaskatti árið 2013.

Wolfgang Schäuble, fjármálaráðherra Þýskalands, upplýsti þingmenn um það föstudaginn 25. nóvember að ríkisstjórnin vildi að samþykkt yrðu meginatriði í „raunverulegu fjárlagasambandi ríkja evru-svæðisins ... mjög bráðlega, hugsanlega 9. desember“ á næsta fundi leiðtogaráðs ESB. Þjóðverjar vilja að stöðugleikasáttmáli evrunnar verði styrktur og teknar verði upp sjálfkrafa refsingar gagnvart ríkjum sem fara yfir skýr mörk um ríkissjóðshalla.

„Við ætlum að fara að þessum [fjár]lögum og ef öll önnur ríki fara að sínum lögum sigrast menn fljótt á skuldavanda einstakra ríkja,“ sagði Schäuble þegar þingið samþykkti fjárlögin fyrir árið 2012. ESB verður að leysa vandann sem hefur valdið kreppunni sagði hann og taldi „allar skyndilausnir eins og að prenta peninga eða varpa skuldinni á alla án sameiginlegrar fjárlagastefnu rangar“. Slík úrræði yrðu aðeins til að létta pressunni af verst settu ríkjunum sem ættu þó að leggja sig mest fram um að leysa vandamál sín.

Í Berlín heyrast raddir sem efast um heilindi Merkel þegar hún segist alfarið andvíg útgáfu evru-skuldabréfa. Jürgen Trittin, þingflokksformaður stjórnarandstöðuflokks græningja, hefur lýst yfir því að afstaða Merkel sé ekkert annað en fyrirsláttur til að knýja fram breytingar á Lissabon-sáttmálanum. Græningjar og hluti jafnaðarmanna sem einnig eru í stjórnarandstöðu styðja útgáfu evru-skuldabréfanna.

Blöð eins og Financial Times Deutschland og Tagesspiegel í Berlín að samstaðan um að standa gegn evur-skuldabréfum sé að gliðna á þýska þinginu, ekki sist meðal kristilegra demókrata (CDU), flokksmanna Merkel. Deutsche Welle segir að háværar kröfur frjálsra demókrata, samstarfsmanna kristilegra að baki Merkel, um að ríkisstjórnin breyti ekki um stefnu gefi til kynna að þeir telji hættu á ferðum.