David Cameron ber höfuð og herðar yfir keppinauta eftir að hann hafnaði aðild að evru-samningi

David Cameron, forsætisráðherra Bretlands, nýtur mun meiri vinsælda en keppinautar hans á hinum pólitíska vettvangi samkvæmt niðurstöðum ICM-könnunar fyrir The Guardian sem birt var á jóladag. 48% töldu að hann stæði sig vel í starfi en 43% voru öndverðrar skoðunar.

David Cameron og George Osborne

Samkvæmt þessu er Cameron með fimm prósenstustig í plús þegar vinsældir hans eru metnar. Ed Milidand, formaður Verkamannaflokksins, fær hins vegar 17 í mínus og Nick Clegg, leiðtogi fráslyndra, fær 19 í mínus og George Osborne fjármálaráðherra fær tvo í mínus.

Vinsældir Camerons eru töluvert meiri en ríkisstjórnarinnar sem hann leiðir. Um 47% töldu að ríkisstjórnin stæði sig ekki vel en 39% voru annarrar skoðunar.

Bent er á að íhaldsmenn hafi mælst með meiria fylgi eftir að Cameron neitaði að eiga aðild að evru-samningnum sem er í smíðum innan ESB. Um tíma eftir það nutu þeir sex prósentustiga forskots gagnvart Verkamannaflokknum.

Niðurstöðurnar sem birtar voru á jóladag sýna að fylgið sé að jafnast milli flokkanna, nú njóta íhaldsmenn stuðnings 37% einu stigi meira en Verkamannaflokkurinn sem fær 36%. Frjálslyndir tapa einu stigi og fá 15%.

Um 50% kjósenda telja að Cameron „taki vel á krísum“ en 40% eru ósammála því. Öðru máli gegnir um Ed Miliband aðeins 21% töldu hann færan til að „taka á krísum“ en 44% að hann væri það ekki.

Þegar spurt var hvort Cameron hefði hugrekki til að segja sannleikann í stað þess að eltast við vinsældir töldu 55% að svo væri en 37% voru annarrar skoðunar. Miliband fékk 41% stuðning í þessu tilviki en 43% gáfu honum neikvæða einkunn.

Aðeins 34% sögðu að Cameron skildi „fólk eins og mig“ en 59% töldu að svo væri ekki, þarna fékk Miliband aðeins betri einkunn 37% en 47% voru því ósammála.

Í breskum blöðum segir að forystumenn Verkamannaflokksins ættu helst að hafa áhyggjur af því að eftir harðar efnahagsaðgerðir ríkisstjórnarinnar skuli 44% aðspurðra telja Cameron og Osborne best færa um að glíma við efnahagsvandann en aðeins 23% veðja á Miliband og Ed Balls, skugga-fjármálaráðherra.