Dönsk stjórnvöld undir smásjá vegna forystu innan ESB - fylgislítil stjórn hjá fyrirvaraþjóð

Athygli beinist nú að dönskum stjórnvöldum og stöðu Dana innan Evrópusambandsins því að danska ríkisstjórnin verður í forsæti innan Evrópusambandsins frá 1. janúar til 1. júlí. Í nýjasta hefti The Economist er vakin athygli á því hve lítilla vinsælda vinstri-stjórn Helle Thorning-Schmidt nýtur heima fyrir. Það auðveldi henni ekki að takast á við formennsku innan ESB að 60% Dana trúi því ekki að ESB ráði við skuldakreppuna og aðeins 24% styðji upptöku evru. Fyrirsögnin í The Economist er: Hroðalegir hveitibrauðsdagar Helle.

Þá er þess getið að innan eins stjórnarflokkanna, Sósíalíska þjóðarflokksins, sé vaxandi óánægja með að Villy Søvndal, formaður flokksins, sé utanríkisráðherra auk þess sem hann sæti gagnrýni fyrir klæðaburð og litla málakunnáttu. The Economist vekur einnig athygli á vandræðum Ole Sohns, atvinnumálaráðherra Dana, vegna starfa hans sem formanns Kommúnistaflokks Danmerkur fyrir tveimur áratugum.

Í frétt AFP-fréttastofunnar í tilefni af því að Danir setjast í forsæti innan ESB sunnudaginn 1. janúar 2012 er minnt á að vinstri-stjórnin í Danmörku eigi ekki marga hugsjónabræður meðal ríkisstjórna innan ESB. Þá eigi stjórnin á hættu að standa á hliðarlínunni í átökunum sem framundan séu innan ESB af því að Danir noti ekki evru og þeim sé ekki skylt að taka hana upp vegna fyrirvara frá árinu 1992 þegar þeir höfnuðu Maastricht-sáttmálanum í þjóðaratkvæðagreiðslu.

„Ég skil fullkomlega að ríkisstjórnir landanna 17 á evru-svæðinu verða að taka ákvarðanir sem snerta þær einar,“ segir Helle Thorning-Schmidt forsætisráðherra við AFP-fréttastofuna.

Hún segir það hins vegar í samræmi við hagsmuni kjarnaríkja ESB, Frakklands og Þýskalands að „halda ríkjunum 27 saman“ og hafa samráð við öll ESB-ríki „.þegar ákvarðanir snerta þau“ þar sem á „hættustundu verðum við að hafa trú á stofnunum okkar,“ segir forsætisráðherrann.

Fyrirvarar Dana frá 1992 snerta fleira en aðild að evru-samstarfinu. Þeir „verða að sjálfsögðu virtir,“ segir Nicolai Wammen, Evrópumálaráðherra Dana, við AFP. Hann leggur jafnframt áherslu á að „við munum einnig stjórna fundum um þessi málefni“.

Thorning-Schmidt sagði að dönsk stjórnvöld myndu reyna að verða „brú á milli ríkjanna 17 og 27“ til að koma í veg fyrir að bilið breikkaði milli evru-ríkja og ekki-evru-ríkja innan ESB.

Wammen sagði að hann vildi að Bretar yrðu áfram „mjög virkir innan evrópsku fjölskyldunnar“ og að innan ESB yrðu menn að „finna skýrar lausnir á skýrum vandamálum“.

Auk þess sem Danir verða að finna leið til að halda ríkjunum 27 að sama borði verða þeir að leita sátta vegna ágreinings um efni fjárlaga ESB á árunum 2014 til 2020. Thorning-Schmidt kvíðir ekki að takast á við það verkefni enda hafi danskir stjórnmálamenn það sem „sérgrein“ að komast að málamiðlunum, sjálf sé hún í forsæti þriggja flokka stjórnar.

Þá segir að í forsætistíð sinni ætli Danir að beina athygli að endurnýjanlegum orkugjöfum til að fjölga störfum og ýta undir hagvöxt í Evrópu.

„Við teljum að hluti lausna vandans felist í því að tryggja fjárfestingu í orkusparnaði og grænum hagvexti. Hver evra sem rennur til þess að nýta orkugjafa betur er til þess fallin að tryggja störf í Evrópu. Hver evra sem nýtt er til að flytja inn olíu hverfur frá Evrópu. Þetta leiðir til þess að græn-markmið skipta einna mestu fyrir framtíðarsamstarf í Evrópu,“ sagði Martin Lidegaard, loftslagsmálaráðherra Dana, við AFP.

Þá kemur fram að dönsk stjórnvöld vilji leita að nýjum viðskiptatækifærum fyrir evrópsk fyrirtæki með því að semja við Japani, Kínverja, Indverja og Túnisbúa . Þá er stefnt að því að herða landamæraeftirlit og eftirlit með innflytjendum.