Viktor Orbán segir ESB-þingmönnum að hann standi vörð um kristin gildi og vilji að seðlabankamenn sverji landi sínu hollustu

Viktor Orbán, forsætisráðherra Ungverjalands, lýsti sjálfum sér sem verndara kristinna gilda og fjölskyldunnar á vettvangi ESB á fundi með ESB-þingmönnum miðvikudaginn 18. janúar þar sem hann sat undir ásökunum um að vera „alræðissinni“. Hann gagnrýndi afstöðu Þjóðverja til skuldakreppunnar.

Viktor Orban

„Við virðum kristin gildi, við teljum að ættjarðarást sé mikilvæg og að fjölskyldan sé mikilvæg,“ sagði Orbán við þingmennina í umræðum sem oft urðu heitar í Evrópuþinginu en þangað hélt forsætisráðherrann til að verja nýja stjórnarskrá Ungverjalands. Leiðtogi græningja líkti Orbán við Fidel Castro á Kúbu.

Orbán sagði að hin þjóðlegu gildi sem honum væru kær nytu „ekki virðingar hér í þessu húsi“ og vísaði þá til þinghúss ESB í Strassborg. Eftir umræðurnar sagði Orbán við blaðamenn að hann mundi ekki þola að stefna stjórnar sinnar yrði mótuð af alþjóðastofnunum og vísaði þar til ESB og Alþjóðagjaldeyrissjóðsins sem hafa sett Ungverjum skilyrði í tengslum við ósk þeirra um fjárhagslega aðstoð.

Ungverjar eru ekki meðal evru-þjóða. Orbán sagðist fagna því ef Alþjóðagjaldeyrissjóðurinn vildi aðstoða stjórn sína í efnahagserfiðleikunum. „Við viljum hins vegar ekki lenda í sömu stöðu og Grikkir sem verða að una því að Þjóðverjar segjast ekki lána þeim fé nema Grikkir fari að kröfum þeirra. Á það fellst ég ekki. Við viljum ekki fé frá Þýskalandi, frá Evrópusambandinu,“ sagði forsætisráðherrann.

Stefnt er að viðræðum milli fulltrúa ESB og Ungverja föstudaginn 20. janúar um þau þrjú mál sem framkvæmdastjórn ESB hefur gagnrýnt og snerta nýja stjórnarskrá Ungverjalands. Eitt þessara mála varðar Seðlabanka Ungverjalands. Orbán sagðist ekki mundu kvika frá einu atriði: nýju lagaskilyrði sem krefst þess að starfsmenn seðlabankans sverji hagsmunum lands síns hollustu.

„Það er eðlilegt að opinberir starfsmenn vinni slíkan eið,“ sagði Orbán.

Martin Schulz, nýkjörinn forseti ESB-þingsins, sagðist deila hinum kristnu gildum Orbáns sem kaþolikki. Hann hvatti hins vegar til trúfrelsis í Evrópu annars mundi hún falla.

Heimild: AFP