Sænski forsætis­ráðherrann fær skilyrta heimild þingsins til að ganga að ríkisfjármálasamningi innan ESB

ESB-nefnd sænska þingsins samþykkti föstudaginn 27. janúar skilyrta heimild til ríkisstjórnarinnar til að ganga að ríkisfjármálasamningnum til stuðnings evrunni á leiðtogafundi ESB 30. janúar.

Frederik Reinfeldt, forsætisráðherra Svíþjóðar, og minnihlutastjórn hans samdi við jafnaðarmenn um efni þess umboðs sem ráðherrann hefur á leiðtogafundinum til að ganga að samningnum. Ríkisstjórnin mælti með aðild að ríkisfjármálasamningnum en jafnaðarmenn lýstu yfir ótta við að með aðildinni yrði Svíum laumað inn á evru-svæðið um „bakdyrnar“. Þeir höfnuðu aðildinni í þjóðaratkvæðagreiðslu árið 2003.

Samkomulag stjórnarflokkanna og jafnaðarmanna hefur að geyma fjögur skilyrði sem sænski forsætisráðherrann mun kynna á fundinum í Brussel nk. mánudag. Eitt þeirra er að Svíum verði ekki gert skylt að framselja neitt af fjárlagavaldi sænska þingsins. Þá vilja Svíar ríkari aðild að ákvörðunum um framkvæmd samningsins en mælt er fyrir í drögum hans.

Jafnaðarmenn hafa lagt til að Svíar tryggi áhrif sín innan evru-svæðisins með því að eiga fulltrúa á fundum leiðtoga evru-ríkjanna þegar þeir ræði um ríkisfjármálasamninginn. Aðild ESB-ríkja sem ekki nota evru að evru-leiðtogafundum er viðkvæmt mál fyrir sum evru-ríki, einkum Frakka sem vilja ekki slíka sameiginlega fundi nema einu sinni á ári. Niðurstaða fundar ESB-nefndar sænska þingsins varð sú að gera kröfuna um setu á evru-leiðtogafundum ekki að úrslitaatriði. Finna mætti aðrar leiðir til að tryggja áhrif Svía ef kröfunni varðandi leiðtogafundina yrði hafnað.

Breska ríkisstjórnin er eina ESB-stjórnin sem ekki ætlar að taka afstöðu til aðildar að ríkisfjármálasamningnum. Stefnt er að því að ná samkomulagi um meginatriði samningsins 30. janúar og rita undir hann á fundi 1. og .2 mars.