Utanríkis­ráðherra segir samningsmarkmið í gjaldmiðilsmálum á næsta leiti - alþingi ekki með í ráðum segir þing­flokksformaður sjálfstæðis­manna

Ragnheiður Elín Árnadóttir

Össur Skarphéðinsson utanríkisráðherra sagði á alþingi þriðjudaginn 21. febrúar að sá hópur í aðildarviðræðunum við Ísland sem fjallar um gjaldmiðilsmál undir formennsku Más Guðmundssonar seðlabankastjóra myndi á „næstu dögum, jafnvel í þessari viku“ leggja fram „drög að samningsafstöðu“ um myntsamstarf við Evrópusambandið. Ragnheiður Elín Árnadóttir, þingflokksformaður Sjálfstæðisflokksins, sagði á þingi miðvikudaginn 22. febrúar að þessi yfirlýsing utanríkisráðherra kæmi sér á óvart. Hún ætti sæti í utanríkismálanefnd og þar hefði ekki verið gerð nein grein fyrir þessu máli og samkvæmt vefsíðu utanríkisráðuneytisins hefði gjaldmiðilsnefndin ekki komið saman síðan 22. febrúar árið 2011.

Ragnheiður Elín spurði utanríkisráðherra út í vinnubrögðin við mótun samningsmarkmiða í gjaldmiðilsmálum og sagði meðal annars:

„Ég verð að viðurkenna að þó að ég sitji í utanríkismálanefnd hef ég ekkert heyrt um þau [markmiðin]. Nýjasta fundarfrásögn samningahópsins um gjaldmiðilsmál er ársgömul, hún er frá 22. febrúar 2011. Ef unnið er að samningsafstöðu sem á að birtast á næstu dögum eða í þessari viku velti ég fyrir mér hvar í ósköpunum verið sé að vinna að henni. Það er ekki verið að gera það í þessum blessaða samningahópi og ekki er verið að kynna þessa samningsafstöðu á hinu háa Alþingi. Mér finnst þetta óboðlegt, svona framkoma við Alþingi er ekki líðandi.“

Í ræðu sinni 21. febrúar sagði Össur að gjaldmiðilsnefndin mundi móta fyrir Íslands hönd „þær kröfur sem við munum leggja fram og verða síðan teknar til skoðunar í samninganefndinni og síðan í ráðherranefnd og jafnvel í ríkisstjórninni. Ef ágreiningur er um það, sem ég á ekki von á, verður það væntanlega rætt í þinginu. Í öllu falli verður það kynnt þinginu“.

Þá sagði utanríkisráðherra: „ Við fylgjum mjög nákvæmlega því sem segir í meirihlutaáliti utanríkismálanefndar og þar liggur það algjörlega ljóst fyrir að Íslendingar stefna að því ef af aðild verður að taka upp evruna. Við munum stefna að því að fara í ERM II [gengissamstarf ESB] eins fljótt og auðið er. Eistum og Slóvenum tókst það tveimur mánuðum eftir að aðild var fullgilt.“

Í áliti meirihluta utanríkismálanefndar alþingis frá 16.júlí 2009 segir meðal annars um gjaldmiðilsmál:

„Að viðræður um gjaldmiðilsmál verði forgangsverkefni í samningaviðræðunum og að leitað verði eftir samkomulagi við ESB og Seðlabanka Evrópu um stuðning við krónuna sem fyrst þannig að Ísland geti við fyrsta mögulega tækifæri hafið þátttöku í samstarfi ESB á sviði efnahags- og peningamála (ERM II) og

- að tryggt verði í samræmi við fyrri fordæmi að mikil skuldsetning ríkissjóðs komi ekki í veg fyrir að Ísland geti tekið upp evruna þegar þar að kemur enda liggi þá fyrir raunhæf áætlun um lækkun skulda.“