Evrópu­sambandið og Merkel: Þrennar örlagaríkar kosningar sunnudaginn 6. maí

Angela Merkel og Nicolas Sarkozy

Þrennar kosningar fara fram sunnudaginn 6. maí sem kunna að ráða miklu um framvindu mála innan Evrópusambandsins. Frakkar kjósa forseta, Grikkir kjósa menn á þing og kosið er til sambandslandsþingsins í Slesvík-Holstein í Þýskalandi. Öllum er ljóst samhengi kosninganna í Frakklandi og Grikklandi við þróun mála á evru-svæðinu. Sambandslandkosningarnar í Þýskalandi skipta ekki síður miklu því að þær geta veikt Angelu Merkel Þýskalandskanslara á heimavelli hennar.

Á vefsíðunni SpiegelOnline segir að það ráðist í þessum kosningum hvort Angela Merkel geti haldið fast í stefnuna sem hún hefur mótað í baráttunni við skuldavandann á evru-svæðinu. Veikist pólitísk staða hennar heima fyrir á sama tíma og andstæðingar stefnu hennar í öðrum löndum auka fylgi sitt lendi hún í áður óþekktri stöðu. Þverstæðan varðandi Merkel sé að hún sé vinsælasti stjórnmálamaður Þýskalands þegar spurt sé um leiðtoga þjóðarinnar en fylgi flokks hennar minnki við kosningar í einstökum sambandslöndum Þýskalands. Utan Þýskalands sé dregin upp af henni sú mynd að niðurskurður og aðhaldsaðgerðir séu hennar verk.

Fréttaritari BBC hefur verið á ferð um Grikkland í tilefni af þingkosningunum þar. Hann hefur rætt við fjölda almennra borgara. Sagði hann að margir léttu sér lund með því að segja brandara um hrunið í Grikklandi og afleiðingar þess. Þessir brandarar væru hins vegar þess eðlis að hann treysti sér ekki til að endurtaka þá fyrir hlustendur BBC, síst þá sem snerust um Angelu Merkel.

Kristilegir demókratar (CDU), flokksmenn Merkel, sitja nú við stjórnvölinn í Slesvík-Holstein í samsteypustjórn með Frjálsum demókrötum (FDP). Allar kannanir benda til þess að flokkarnir hafi ekki bolmagn til mynda meirihluta eftir þingkosningarnar. Nicolas Sarkozy Frakklandsforseti hefur verið nánasti samstarfsmaður Merkel í baráttunni við skuldavandann á evru-svæðinu. Allt bendir til þess að hann tapi í kosningunum á sunnudag. Þá þykja allar líkur á því að pólitísk upplausn muni ríkja í Grikklandi eftir þingkosningarnar þar.

Enginn spáir því að tengslin milli Þýskalands og Frakklands rofni þótt skipt verði um stjórnarherra í París. Það kann hins vegar að skapa Merkel vandræði á heimavelli eigi hún í útistöðum við nýjan forseta Frakklands vegna mikilvægra mála sem snerta efnahag þýska ríkisins. Þá er ekki ólíklegt að þýskir jafnaðarmenn telji sig fá byr í seglin með sigri sósíalista í Frakklandi. Þeir láti því meira að sér kveða í stjórnarandstöðu í Berlín en til þessa. Stuðningsmenn Merkel segja að ástæðulaust sé að gera sér of mikla rellu út af skoðunum frambjóðandans François Hollandes. Verði hann forseti komist hann ekki hjá því að horfast í augu við staðreyndir og taka mið af þunga markaðsaflanna og hann muni því fljótt grípa til annarra úrræða en hann boði fyrir kosningar.