Pútin leggur áherslu á að efla flotann á Norður-Íshafi og gæslu heimskautahagsmuna Rússlands - meðal fyrstu forsetafyrirmæla hans

Aðeins liðu nokkrar klukkustundir frá því að Vladimir Pútin varð forseti Rússlands í þriðja sinn mánudaginn 7. maí þar til hann gaf ríkisstjórninni fyrirmæli um að sjá til þess að rússneski flotinn yrði styrktur á Norður-Íshafi, efla skyldi leynilega upplýsingaöflun á svæðinu, endurnýja vopnabúnað og ákvarða ytri mörk landgrunns ríkjanna sem eiga land að íshafinu.

Vladimir Pútin gengur fram sem forseti Rússlands í þriðja sinn 7. maí 2012.

Á vefsíðunni BarentsObserver segir frá því þriðjudaginn 8. maí að Pútin hafi ekki dregið á langinn að kynna forgangsverkefni næstu sex ára. Hann hafi mánudaginn 7. maí gefið út nokkur fyrirmæli, þrjú þeirra snerust um varnar- og utanríkismál.

Í fyrirmælunum um gerð áætlana fyrir heraflann og endurnýjun varna landsins segir að sérstaklega beri að hafa aðstæður á Norður-Íshafi og í fjarlægari Austurlöndum í huga þegar unnið sé að málefnum flotans, tryggja eigi að hann geti gætt rússneskra hagsmuna á þessum slóðum. Þá kemur einnig fram í fyrirmælum Pútíns að árið 2020 skuli 70% af tækjum og vopnakerfum hersaflans hafa verið færð í nútímalegt horf.

Vladimir Pútin gaf einnig út yfirlýsingu um utanríkisstefnu Rússlands. Þar kemur fram að Rússar hafi mikið til mála að leggja innan Sameinuðu þjóðanna, Alþjóðaviðskiptastofnunarinnar, Samtökum fyrrum lýðvelda Sovétríkjanna og G8. Þá er jafnstaða gagnvart Evrópusambandinu nefnd einkum mikilvægi þess að gagnkvæmar vegabréfsáritanir vegna stuttra dvala almennra borgara komi til sögunnar.

Pútin hvetur til þess að skipulega verði unnið að því að setja niður markalínur milli þjóða við Norður-Íshaf í samræmi við alþjóðalög, í því efni verði litið til ytri marka landgrunnsins og hafsvæða. Þetta beri að gera til að tryggja hagsmuni Rússa með tilliti til þjóðaröryggis og efnahags og með það að leiðarljósi að auka traust og samvinnu nágrannaríkja.