BBC: ESB kynnir tillögur um að verja skattgreiðendur fyrir falli banka

Kostnaður lendi á hluthöfum og lánardrottnum

Framkvæmdastjórn Evrópusambandsins hefur um skeið unnið að smíði tillagna, sem eiga að koma í veg fyrir að peningar skattgreiðenda verði notaðir til að bjarga bönkum, sem komnir eru í fjárhagsvandræði. Markmið þessara tillagna er að tryggja, að kostnaður við fall banka lendi á hluthöfum og lánardrottnum bankanna en að kostnaður skattgreiðenda verði lágmarkaður. Þetta kemur fram á BBC í dag, sem segir jafnframt að meginhugmyndirnar verði kynntar í dag. Hins vegar er talið ólíklegt að þær komist til framkvæmda fyrr en að tveimur árum liðnum.

Jafnframt er stefnt að því með hinum nýju reglum að tryggja að áhlaup á banka í einu landi eins og t.d. á Spáni eða Grikklandi leiði ekki til falls bankakerfisins í heild. Þá er lykilatriði að tryggja í slíkum tilvikum að hraðbankar virki.

BBC bendir á að fjármálakreppan hafa leitt til falls fjölmargra banka, Northern Rock í Bretlandi, Lehman Brothers í Bandaríkjunum, íslenzku bankanna, Fortis, sem er hollenzk-belgískur banki, Dexia, sem er fransk-hollenzkur banki og Anglo Irish Bank á Írlandi. Í frétt BBC er talið að spænskir bankar þurfi á að halda 80 milljörðum evra en hingað til hefur verið talað um 40 milljarða evra og hafa þeir samtals 23,5 milljarðar, sem Bankia þarf verið inn í þeirri tölu.

Eins og kunnugt er hafnaði ríkisstjórn Geirs H. Haarde kröfum um að íslenzka ríkið tæki ábyrgð á skuldbindingum íslenzku bankanna haustið 2008 en írska ríkisstjórnin á þeim tíma tók þveröfuga ákvörðun og tók ábyrgð á öllum skuldbindingum írskra banka.

Framkvæmdastjórn Evrópusambandsins hefur tekið afstöðu með kröfu brezkra og hollenzkra stjórnvalda um að íslenzkir skattgreiðendur beri ábyrgð á skuldum hinna föllnu íslenzku einkabanka.