Bænda­samtökin óska skýringa Össurar á ummælum formanns viðræðu­nefndar um sérlausnir í landbúnaðarmálum - viðhorf ESB ekki kynnt bændum

Bændasamtök Íslands (BÍ) hafa ritað Össuri Skarphéðinssyni utanríkisráðherra bréf í tilefni af ummælum Stefáns Hauks Jóhannessonar, sendiherra og formanns viðræðunefndar Íslands gagnvart ESB, um að ESB hafi gefið til kynna að það sé tilbúið til sérlausna fyrir íslenskan landbúnað. Segjast samtökin ekki hafa fengið neinar upplýsingar um slík fyrirheit og óska svara utanríkisráðherra um hvað felist í orðum sendiherrans. Bréfið er dagsett 29. maí og hafði svar ekki borist í dag 6. júní eftir því sem Evrópuvaktin telur sig hafa sannreynt.

Hin umræddu ummæli Stefáns Hauks Jóhannessonar féllu í samtali voð „Sveitina“ blað íslenskra ESB-aðildarsinna í samtökunum Já Ísland. Í blaðinu var þessari spurningu beint til sendiherrans:

„Þannig að Íslendingar telja að þessi fordæmi og þessar meginreglur feli í sér að ESB eigi að laga sínar reglur að landbúnaði okkar og semja um lausnir sem taka mið af sérstöðu og aðstæðum hér á landi?“

Svarið haft eftir Stefáni Hauki í beinni ræðu:

„Já, sú er grundvallarreglan og í þeim opnunarviðmiðum sem við höfum fengið frá ESB fyrir landbúnaðarkaflann segir að það eigi að taka tillit til sérstakra aðstæðna í íslenskum landbúnaði í viðræðunum. ESB hefur sýnt í fyrri viðræðum að sambandið er tilbúið að útvíkka sínar reglur og semja um sérlausnir og við erum með vísbendingar um að það sé tilbúið til þess varðandi Ísland eins og í fyrri aðildarviðræðum.“

Í tilefni af þessum orðum beina BÍ eftirfarandi til utanríkisráðherra:

„Bændasamtök Íslands hafa hingað til ekki orðið vör við sérstök fyrirheit af hálfu ESB um sérlausnir fyrir Ísland í landbúnaðarmálum sem þau telja hald í. Bændasamtökin telja því, í tilefni af orðum aðalsamningamanns Íslands, mikilvægt að fá sem gleggstar upplýsingar um hvort þarna séu á ferðinni ný sjónarmið sem ekki hafa verið kynnt áður. Þess er því farið á leit við yður að þér upplýsið hvaða vísbendingar liggi nú fyrir um að ESB sé tilbúið að útvíkka reglur sínar og semja um sérlausnir sem að gagni mættu koma við samningaviðræðurnar og út á hvað slíkar vísbendingar ganga.“

Hér á Evrópuvaktinni hefur birst ítarleg úttekt á afstöðu Bændasamtaka Íslands til ESB-viðræðnanna. Þar kemur meðal annars fram að utanríkisráðherra hefur sniðgengið BÍ og leitast við að búa þannig um hnúta að sjónarmið samtakanna móti ekki afstöðu íslenskra stjórnvalda og að fulltrúar samtakanna fái ekki aðild að samráðshópi um aðildarviðræðurnar. Evrópuvaktin hefur óstaðfestar heimildir fyrir því að ætlan utanríkisráðherra og stækkunardeildar ESB sé að beita fulltrúum finnskra bænda í ESB-áróðri hér á landi til að hafa áhrif á þróun opinberra umræðna um landbúnaðamál og skáka þannig bændasamtökunum og fulltrúum þeirra.