Fjarstýrðum flugtækjum í einkaeign fjölgar ört í Þýskalandi

Sífellt fleiri þýsk fyrirtæki nota fjarstýrð flugtæki til eftirlits og rannsókna. Tæknin þykir skila góðum árangri á hagkvæmu verði en uppi eru efasemdir hjá mörgum um hvort með henni sé brotið gegn friðhelgi og lögum um persónuvernd.

Í frásögn Deutsche Welle (DW) segir að nýlega hafi orðið uppnám í þýska bænum Düren. Lítið fjarstýrt flugtæki sveif hægt yfir skóla bæjarins. Fólk varð hrætt og vissi ekki hvað þetta boðaði. Sumir héldu að um leynilega hernaðaraðgerð væri að ræða eða ríkið hefði gripið til nýrra eftirlitsaðgerða. Við athugun kom í ljós að ljósmynda- og kvikmyndafyrirtæki notaði fjarstýrða tækið til að taka loftmyndir.

Þýsk fyrirtæki nota þessa tækni á æ fleiri sviðum, þau eru nefnd „drone“ á ensku og hafa verið kölluð fjarstýrðar flugvélar. Tækin verða hins vegar sífellt minni og því ekki rétt að kalla þau flugvélar. Nú eru þau notuð til að taka ljósmyndir, kortagerð og eftirlit með stórum sólorkuverum, iðnaðarmannsvirkjum, gasleiðslum og byggingarsvæðum. Þýsk yfirvöld segja að á undanförnum tveimur árum hafi borist 500 umsóknir frá fyrirtækjum, háskólum og einstaklingum um leyfi til að nota fjarstýrð flugtæki og hafi flestar verið samþykktar.

Wolfgang Wieland, talsmaður þýska græningjaflokksins í öryggismálum, óttast að misnota megi flugtækin fjarstýrðu. „Það er ódýrara að eiga svona tæki en þyrlu. Ef til dæmis Deutsche Bahn (þýsku ríkisjárnbrautirnar] notaði þau gæti fyrirtækið fylgst með járnbrautakerfinu á mun auðveldari hátt en með þyrlu.“

Lögregla notar fjarstýrð flugtæki til að fylgjast með aðstæðum á knattspyrnuleikjum og mótmælaaðgerðum og til að finna leynilega kannabis-gróðurreiti. Þá hafa háskólar notað tækin til að rannsaka fyrirbrigði eins og eyðingu skóga og jarðvegs.

Á pólitískum vettvangi ræða Þjóðverjar hvort herða þurfi reglur um notkun fjarstýrðu flugtækjanna. Núgildandi reglur takmarka stærð tækjanna við 25 kiló og sá sem notar tækið má ekki missa sjónar á því. Þá má aðeins mynda á einkalandi með leyfi eiganda þess.

Öll fyrirtæki geta sótt um leyfi til að nota fjarstýrða flugtækni til að halda uppi eftirliti á starfssvæði sínu og ekki er unnt að neita þeim um leyfi til þess.