Vaxta­svindlið í Bretlandi: Skaðlegasta blekkingariðja í nútímasögu, segir breskur þingmaður

Sjálfstæðum sérfræðingi á vegum ríkisstjórnarinnar verður falið að rannsaka starfshætti innan breska bankakerfisins eftir að upplýst var um vaxtasvindl hjá Barclays og fleiri stórum bönkum. Þess er vænst að hann ljúki störfum í haust og skili skýrslu ásamt tillögum um hvernig standa beri að því að ákvarða millibankavexti. Hugsanlegt er að Englandsbanka, breska seðlabankanum, verði falið það hlutverk eða regluverði í City of London.

Bob Diamond

Breska bankasambandið (BBA) hefur hafið eigin tillögugerð um framtíð Libor (millibankavaxta-kerfisins) og var þess vænst að niðurstaða verði kynnt fyrir lok júlí. Eftir að ríkisstjórnin tók málið í sínar hendur með ákvörðun um að skipa sjálfstæðan sérfræðing til að smíða nýjar tillögur að lokinni rannsókn sinni er óljóst hvernig BBA tekur á máum.

Bob Diamond, forstjóri Barclays, hefur verið kallaður fyrir fjárlaganefnd breska þingsins miðvikudaginn 4. júlí. Forstjórinn heldur fast í stöðu sína þrátt fyrir þunga gagnrýni á hann og bankann fyrir að hagræða millibankavöxtum í því skyni að bæta hag bankans.

Hluthafar í Barclays hafa krafist sjálfstæðrar rannsóknar innan bankans eftir að breska fjármálaeftirlitið (FSA) sektaði hann um 290 milljónir punda fyrir að ákvarða vexti með svindli.

Andrew Tyrie, formaður fjárlagarnefndar þingsins, sagði að vaxtasvindlið væri „skaðlegasta blekkingariðja“ í nútímasögu og það hefði enn spillt áliti manna á fjármálaþjónustu í Bretlandi. Hann sagði:

„Enn hefur verið dregið úr trausti almennings á bönkunum. Menn verða þegar í stað að hefja aðgerðir til að auka þá í áliti. Þingið og þjóðin verða að fá upplýsingar um hvað fór úr skorðum og hvort skemmdarvargarnir hafa verið látnir víkja. Við verðum einnig að fá staðfestingu á því að teknir hafi verið upp nýir siðir.“

Stephen Hester, forstjóri Royal Bank of Scotland (RBS), hefur tilkynnt að hann afsali sér 2 milljóna punda bónus sínum í ár vegna tölvumistaka innan bankans sem olli vandræðum fyrir milljónir viðskiptavina hans.

Hester hefur staðfest að RBS hafi verið dregið inn í rannsóknina vegna Libor vaxtablekkingarleiksins hjá Barclays. Hann sagði í viðtali við BBC að kvöldi föstudags 29. júní að bankastarfsemi „hefði næstum slitnað úr tengslum við þjóðlífið“ og að endurskoða þurfi „bankakúlturinn“ frá grunni. Hester hefur verið forstjóri RBS í þrjú og hálft ár.

„Sumir héldu að þeir væru herrar alheimsins þegar þeír áttu að vera þjónar viðskiptavinanna,“ sagði Hester og bætti við:

„Þessi mál eru lýsandi fyrir hve kúltúrinn innan bankanna spilltist fyrir fjármálakreppun, ég kom úr annarri grein inn í bankaheiminn fyrir þremur og hálfu ári, hlutverk mitt var að breyta RBS til hins betra, rekstrarlega og að því er kúlturinn varðar.“