Merkel og Monti stilltu saman strengi á fundi í Róm - Ítalir þarfnast ekki aðstoðar

Mario Monti, forsætisráðherra Ítalíu, segir þjóðina á réttri leið og hún ráði við eigin skuldir. Þessi orð lét hann falla miðvikudaginn 4. júlí eftir fund með Angelu Merkel Þýskalandskanslara.

Angela Merkel og Mario Monti í Róm 4. júlí 2012.

„Ítalir þurfa ekki á aðstoð að halda,“ sagði Mario Monti á sameiginlegum blaðamannafundi með Angelu Merkel í Róm. „Ríkisfjárlagahallinn verður 2% af vergri landframleiðslu árið 2012 – helmingi minni en meðaltalið í Evrópu og á næsta ári verður afgangur á kerfilægum rekstri.“

Samkvæmt þessari tölu hefur hallinn aukist frá sem áður var spáð þar sem gert var ráð fyrir að hann yrði 1,3%.

Mario Monti er utanþingsmaður sem fenginn var til að leiða ríkisstjórn Ítalíu þegar Silvio Berlusconi var ýtt frá völdum. Hann er ekki tengdur neinum flokki en sat um tíma í framkvæmdastjórn ESB og nýtur trausts embættismanna í Brussel. Hann sagði markmið sitt nú að létta almenna skuldabyrði ítalska ríkisins samhliða því sem tekið væri á hallarekstri ríkisins.

Merkel bar lof á kerfisbreytingarnar undir stjórn Montis, þær væru „frábærar“ og ríkisstjórnir landanna ætluðu að vinna saman að því að sigrast á skuldavanda evrunnar.

Þau gerðu bæði lítið úr fréttum um ágreining á leiðtogafundi ESB í Brussel 28. og 29. júní. Margir hafa lýst því sem áfalli fyrir Merkel að Monti og Mariano Rajoy, forsætisráðherra Spánar, skyldi takast að tryggja sérafgreiðslu á fjárhagslegum stuðningi við ríki sín.

Merkel sagði eðlilegt að á fundum ESB-leiðtoga „gæti hvert ríki eigin hagsmuna“ og að leiðtogarnir hefðu komist að einróma niðurstöðu. „Það er einmitt þetta sem gerðist að kvöldi fimmtudags (28. júní) og að morgni föstudagsins (29. júní),“ sagði Merkel.

Monti sagði það alltaf mikið ánægjuefni fyrir sig að hitta þýska kanslarann.