Liborhneykslið breiðist út til Bandaríkjanna-þing­nefndir hefjast handa

Bob Diamond

Nú er talið líklegt að Bob Diamond, fyrrverandi forstjóri Barclaysbanka verði kallaður fyrir bandaríska þingnend eða nefndir til að svara spurningum um Liborvaxtahneykslið. Um er að ræða bankanefnd öldungadeildarinnar og nefnd fulltrúadeildar, sem fjallar um fjármálaþjónustu.

Nefnd öldungadeildarinnar mun kalla fyrir sig bæði Bernanke, bankastjóra Seðlabanka Bandaríkjanna og Timothy Geithner, fjármálaráðherra fyrir sumarfrí, sem hefjast í ágúst. Bandaríska dómsmálaráðuneytið hefur hafið rannsókn á málinu og borgir og lífeyrissjóðir undirbúa málssóknir á þeirri forsendu, að þessir aðilar hafi orðið fyrir fjártjóni. Nú þegar stendur yfir rannsókn á Citigroup, HSBC og JP Morgan Chase af sömu ástæðum.

Guardian sem segir frá þessu upplýsir að um 45% fasteignaveðlána í Bandaríkjunum tengist Libor. Borgir á borð við Baltimore haldi því fram, að þær hafi orðið að skera niður nauðsynlega þjónustu vegna taps á fjárfestingum, sem hafi verið tengdar Libor.

Guardian bendir á að Geithner hafi verið forstjóri Seðlabanka New York á árinu 2008 og þann 28. apríl það ár hafi hann efnt til fundar um Libor og komið á framfæri við brezk stjórnvöld áhyggjum sínum. Viðmælendur Guardian telja hugsanlegt að repúblikanar reyni að tengja Geithner við málið. Aðrir segja, að ekkert kæmi Obama betur en að geta ákært bankamann af þessum sökum fyrir fosetakosningarnar í nóvember.