Mario Draghi boðar stefnubreytingu gagnvart eigendum skulda­bréfa banka-verði að taka á sig töp

Seðlabanki Evrópu er að breyta um stefnu í grundvallaratriðum, þegar um er að ræða fall banka og hagsmuni eigenda helztu skuldabréfa, sem slíkir bankar hafa gefið út. Hingað til hefur ekki mátt ræða það að eigendur skuldabréfa verði fyrir töpum. (Þess vegna fékk írska ríkisstjórnin fyrirmæli haustið 2008 frá ESB og Seðlabanka Evrópu um að lýsa yfir ábyrgð á öllum skuldbindingum írskra einkabanka).Nú upplýsir Wall Street Journal, að Mario Draghi, aðalforstjóri SE hafi á fundi í Brussel að kvöldi 9. júlí sl. hvatt til þess að skuldabréfaeigendur yrðu látnir taka á sig töp. WSJ bendir á að þetta sé grundvallarbreyting á afstöðu bankans miðað við stefnu hans gagnvart írsku bönkunum,

Í frétt blaðsins kemur fram að fjármálaráðherrar evruríkjanna hafi hafnað þessum tillögum Draghi á þeirri forsendu, að hún mundi valda óróa á mörkuðum. Hins vegar er gert ráð fyrir að hluthafar og ver settir skuldabréfaeigendur banka á Spáni taki á sig töp.

Þrátt fyrir þessa afstöðu fjármálaráðherra evruríkjanna telur WSJ tillögu Draghi vísbendingu um að stefnubreyting sé í aðsigi og meiri háttar breyting sé að verða á því hvernig tekið sé á málefnum banka í vandræðum.