Írski sjávar­útvegs­ráðherrann ræðst harkalega á Íslendinga og Færeyinga á ráðherrafundi í Brussel - krefst þess að makrílkröfur Íslendinga séu að engu hafðar

Simon Coveney, sjávarútvegsráðherra Írlands, gagnrýndi Íslendinga og Færeyinga harðlega fyrir ofveiði á makríl á fundi sjávarútvegs- og landbúnaðarráðherra ESB-ríkjanna í Brussel mánudaginn 16. júlí. Í frétt á vefsíðu írska ráðuneytisins segir að ráðherrann hafi séð til þess að makrílmálið hafi orðið eitt af helstu málum fundarins sem snerist samkvæmt dagskrá hins vegar að mestu um landbúnaðarmál.

Simon Coveney

Fyrir fundinn sendu Írar ríkjum ESB orðsendingu þar sem fullyrt var að rannsóknir sýndu að makríll væri að hverfa af Íslandsmiðum, ofveiði Íslendinga og brotthvarf makrílsins réttlætti ekki að ESB héldi í tilboð sitt um 7,5% veiðihlutdeild Íslendinga. Tilboðið ætti að draga til baka.

Á vefsíðu írska ráðuneytisins segir að ráðherrann hafi krafist þess að framkvæmdastjórn ESB fallist aðeins á þá lausn makríldeilunnar sem skaði ekki makrílhagsmuni Íra. Framkvæmdastjórnin eigi umfram allt að taka ríkara tillit til ríkra hagsmuna Íra af makrílveiðum.

Ráðuneytið bendir á að sögulega eigi Íslendingar ekki neinna hagsmuna að gæta vegna veiða á makríl og þeir hafi ekki átt aðild að sameiginlegri stjórn á stofninum eða skiptingu hans en árið 2011 hafi þeir slegið eign sinni á 23% ráðlagðs heildarafla. Nú sýni alþjóðarannsóknir að makríl hafi líklega fækkað mikið í íslenskri lögsögu og ekki sé unnt að verða við háum kröfum þeirra um hlutdeild í aflanum, fyrir því séu hvorki líffræðileg eða svæðisbundin rök.

Jóhann Sigurjónsson, forstjóri Hafrannróknarstofnunar, sagði í samtali við fréttastofu ríkisútvarpsins 16. júlí að rannsóknum á makríl á Íslandsmiðum væri ekki lokið, niðurstöðu yrði ekki að vænta fyrr en í lok ágúst.. Vísindaleg rök Íra stæðust því ekki.

Í ræðu sinni á ESB-ráðherrafundinum sagði Simon Coveney meðal annars:

„Innan ESB og í samvinnu við Norðmenn höfum við byggt um makrílstofninn og tryggt sjálfbærni hans með stjórn á veiðum í hann. Ég get ekki réttlætt stöðu þar sem Íslendingar og Færeyingar geta hvor um sig fengið óeðlilega mikla hlutdeild í makrílstofninum án þess að fyrir því séu nokkur vísindaleg rök eða söguleg veiðihefð. Samningur við Íslendinga eina mun ekki bjarga stofninum en kynni að leiða til þess að störfum fækkaði varanlega innan ESB og tekjur minnkuðu í afskekktum strandbyggðum og þess vegna hvet ég framkvæmdastjórnina til að fallast aðeins á lausn sem kemur í veg fyrir að þetta gerist.“

Írska ráðuneytið bendir á að makríll hafi skipt meginmáli fyrir írskan fiskiðnað síðan á áttunda áratug síðustu aldar og nú sé leyfilegur, árlegur makrílafli Íra 68.000 tonn. Íslendingar hafi hins vegar fyrst hafið markílveiðar árið 2008 og veiði nú 150.000 tonn á ári.