Deutsche Bank reynir að bjarga eigin skinni með samstarfi við rannsókn á vaxta­svindli

Fulltrúar Deutsche Bank, stærsta banka Þýskalands, vinna nú með þeim sem rannsaka svindlið á millibankavöxtum. Rekja má samvinnu bankans við eftirlitsaðila til þess að stjórnendur hans vilji leggja sig fram í því skyni að lækka hugsanlegar sektir á bankann.

Af hálfu Deutsche Bank hefur verið farið fram á við framkvæmdastjórn ESB og stjórnvöld í Sviss að bankinn fái stöðu sem samstarfsvitni í rannsókninni sem stofnað hefur verið til vegna þess að beitt var blekkingum við að skrá Libor-vexti (London Interbank Offered Rate), millibankavexti í London.

Der Spiegel sagði frá því sunnudaginn 15. júlí að Deutsche Bank hefði þegar árið 2011 boðist til að semja við eftirlitstofnanir innan ESB í því skyni „að takmarka tjón fyrir orðspor sitt“. Der Spiegel hefur eftir heimildarmanni sínum: „Nú ríkir kvíði innan Deutsche Bank.“

Bankinn er einn af um 20 bönkum sem taldir koma að svindli vegna Libor-vaxtanna. Þeir eru skráðir af British Bankers' Association samkvæmt upplýsingum frá stórbönkum um hve mikið þeir telji sig þurfa að greiða fyrir lán sín á milli. Bankarnir eru sakaðir um að hafa gefið rangar upplýsingar um Libor á árunum 2005 til 2011.

Der Spiegel segir að framkvæmdastjórn ESB hafi þegar veitt Barclays-banka í Bretlandi og UBS-bankanum í Sviss stöðu samstarfsvitnis. Þá hafi framkvæmdastjórnin ákveðið að veita þeim banka fulla sakaruppgjöf sem yrði fyrstur til samstarfs og minni refsingu fyrir tvo aðra banka sem upplýstu um þátt sinn í vaxtasvindlinu.

Barclays-banki sem situr í miðju hneykslisins var sektaður um 350 milljón evrur í júní sl. af breskum og bandarískum yfirvöldum. Þýska fréttastofan DPA vitnar mánudaginn 16, júlí í rannsókn á vegum bandaríska fjárfestingabankans Morgan Stanley sem segi á milljarður dollara sé í húfi fyrir Deutsche Bank og að alls kunni bankarnir sem séu til rannsóknar að verða sektaðir um 22 milljarða dollara.

Heimild: dw.de