Huang Nubo fer niðrandi orðum um Íslendinga - lýsir stolti yfir þátttöku í Kommúnista­flokki Kína

Í frétt á dv.is laugardaginn 21. júlí er vitnað í grein í Washington Times frá miðvikudeginum 4. janúar 2012 eftir Miles Yu í dálki sem heitir Inside China. Miles lýsir Huang Nubo, auðmanni Kína með áhuga á Íslandi, á þennan hátt:

Huang Nubo

„Huang Nubo, fasteignajöfur sem kemur einnig fram sem félagi í Kommúnistaflokki Kína sem að nafninu til segist á móti kapítalisma veittist síðastliðinn fimmtudag [29. desember 2011] að ríkisstjórn Íslands fyrir að hafna 8 milljón dollara tilboði sínu í stóran hluta af landi hinnar norrænu eyþjóðar. Huang hafði óskað eftir að fá að kaupa land til að reisa “umhverfisvæna frístundabyggð„ og leggja golfvelli á 118 fermílna [300 ferkílómetra] landi.

Reiði Huangs komst einnig í fréttir af því að hann taldi að íslenska ríkisstjórnin hefði hafnað sér „sem félaga í kommúnistaflokknum“.

Huang (55 ára) flutti ræðu við athöfn í tilefni af því að hann gaf China-Europe International Business School í Sjanghai 1,58 m. dollara, þar vék hann að nýlegri efnahagskreppu á Íslandi.

„Íslendingar eru sjúkir og þeir eru veiklyndir,“ sagði hann. „Þeir eru hræddir í návist sterks ungs manns.“

Kommúnistaflokkur Kína gortar sig nú af rúmlega 80 milljónum félaga, álíka mörgum og allir íbúar Þýskalands.

Margir telja flokkinn á valdi spillingarafla á öllum stigum, hann stjórnar söfnun auðs og viðskiptatækifærum og ræður yfir eignum þjóðarinnar sem eru að mestu leyti í höndum flokksmanna og þeirra sem hafa tengsl við helstu foringja flokksins.

Huang hefur náin tengsl við innri kjarna flokksins og var áður embættismaður í áróðursráðuneyti flokksins.

Þegar hann afhenti styrkinn í Sjanghai sagði Huang að sögn ríkisfjölmiðla. „Ég er stoltur af því að vera félagi í kommúnistaflokknum.“