Grikkland: AGS ætlar ekki að láta meira fé af mörkum - SE tekur ekki ríkisskulda­bréf sem tryggingu - ótti við ríkisgjaldþrot eykst

Alþjóðagjaldeyrissjóðurinn (AGS) hefur látið þau boð berast til ESB að sjóðurinn muni ekki leggja fram meira fé til að bjarga Grikklandi. Þetta kemur fram á vefsíðu Spiegel sunnudaginn 22. júlí. Þá hefur Seðlabanki Evrópu hætt að taka grísk ríkisskuldabréf sem tryggingu fyrir útgreiðslu lána. Ótti um að Grikkland verði gjaldþrota í haust eykst jafnt og þétt.

Spiegel vitnar í ónefnda háttsetta embættismenn Evrópusambandsins í Brussel sem hafi sagt að AGS ætlaði ekki að leggja meira fé til Grikklands. Á vefsíðunni segir að þetta auki líkur á gjaldþroti Grikklands, jafnvel strax í september 2012.

Fréttin birtist áður en hópur endurskoðenda á vegum þríeykisins, ESB, SE og AGS fer Aþenu. Þeir eiga að efna til enn einnar athugunar á því hvort gríska stjórnin standi við skilyrði sem sett voru fyrir greiðslum annars neyðarlánsins sem hún fékk frá þríeykinu. Næsta greiðsla verður ekki innt af hendi nema staðið sé við skilyrðin.

Af frétt Spiegel má ráða að AGS hafi þegar gert upp hug sinn í málinu og ætli ekki að eiga aðild að því að inna næstu greiðslu til Grikkja af hendi.

Í viðtali við Le Monde sem birt hefur verið hér á Evrópuvaktinni var Mario Draghi, forseti bankastjórnar SE, afdráttarlaus þegar hann var spurður hvort réttmætt væri nú að ræða um brottför Grikkja af evru-svæðinu. Hann sagði:

„Við viljum afdráttarlaust að Grikkir verði áfram þátttakendur í evru-samstarfinu. Þetta er hins vegar mál grísku ríkisstjórnarinnar. Hún hefur tekið á sig skuldbindingar og henni ber nú að standa við þær. Þegar rætt er um breytingar á aðhaldssamningnum [skilyrði fyrir neyðarlánum Grikkja] vil ég bíða eftir niðurstöðum þríeykisins áður en ég lýsi skoðun minni.“

Svarið sýnir að Draghi varpar ábyrgðinni alfarið á grísku ríkisstjórnina um framhaldið. Föstudaginn 20. júlí jók SE þrýsting á grísku ríkisstjórnina til að knýja fram viðbrögð við skilyrðum þríeykisins. Bankinn tilkynnti að hann tæki ekki lengur við grískum ríkisskuldabréfum sem tryggingu fyrir lánum frá SE. Ekki yrði horfið frá þessari ákvörðun nema meðmæli í þá veru kæmu frá sérfræðingum þríeykisins.

Guido Westerwelle, utanríkisráðherra Þýskalands, sagði laugardaginn 21. júlí að ekki væri á döfinni rýmka lánaskilmála gagnvart Grikkjum. Hann sagði í samtali við þýska blaðið Bild:

„Ég sé vaxandi áhuga í Grikklandi á því að breyta samningunum og kröfunum um að stjórnvöldum sé skylt að grípa til umbóta. Ég segi einfaldlega, af þessu verður ekki. Yfir þetta Rubicon-fljót munum við ekki fara.“