Rússar segjast ekki ætla að opna flotastöðvar á fjarlægum slóðum - segja ummæli yfirmanns flotans afflutt

Rússneska varnarmálaráðuneytið hafnar því að ríkisstjórn Rússlands stefnu að því að reisa fyrstu nýju herflotastöðina utan rússnesku landamæranna frá hruni Sovétríkjanna árið 1991. Áður hafði fréttastofa haft eftir yfirmanni rússneska flotans að athygli beindist að Kúbu, Víetnam og Seychelles-eyjum í þessum augnamiði. Ráðuneytið sagði flotaforingjann aldrei hafa sagt þetta.

Viktor Tsjirkov,yfirmaður rússenska flotans.

Vegna fjárskorts hafa Rússar orðið að loka flestum herstöðvum sínum erlendis eftir 1991. Þeir lokuðu síðustu stöð sinni í Víetnam árið 2002. Nú halda þeir aðeins úti herstöðvum í Úkraínu og Sýrlandi utan Rússlands. Vladimir Pútín Rússlandsforseti hefur heitið að efla herstyrk Rússlands.

Undanfarin ár hefur rússneski flotinn látið meira að sér kveða á fjarlægum slóðum en áður, Skip hans hafa meðal annars verið send til aðgerða gegn sjóræningjum undan ströndum Sómalíu.

„Það er rétt við vinnum að því að skapa aðstöðu fyrir flotann utan Rússlands,“ hafði RIA-Novosti fréttastofan eftir Viktor Tsjirkov vara-aðmíráli, yfirmanni rússneska flotans.

Fréttastofan sagði að í Moskvu væri unnið að því að skapa aðstöðu fyrir tæki og búnað á Kúbu, Seychelles-eyjum og í Víetnam.

Varnarmálaráðuneytið í Moskvu segir að Tsjirkov hafi aldrei látið hin tilvituðu orð falla og ekki hafi verið minnst á þetta mál þegar hann ræddi við fréttastofuna.

„Málefni tengd alþjóðasamskiptum falla ekki undir ábyrgðarsvið yfirmanns herflotans,“ sagði ráðuneytið í yfirlýsingu á vefsíðu sinni. Ummælin eru „ímyndun höfundarins sem ákvað að stunda æsifréttamennsku í stað þess að sýna hæfni sína og vandvirkni sem blaðamaður.“

Þegar Pútín var forseti í fyrra skipti árið 2002 lokuðu Rússar herstöð sinni í Cam Rahn í Víetnam þar sem þeir höfðu verið síðan 1979. Vísað var til þess að Víetnamar hefðu krafist hærri leigu en áður fyrir aðstöðuna. Þá var einnig talið að Rússar hefðu viljað bæta samskipti við Bandaríkjamenn með því að loka stöðinni.

Rússar halda úti herafla í Sevastopol í Úkraínu þar sem Svartahafsfloti þeirra hefur aðsetur. Þá hafa herskip þeirra aðgang að höfninni í Tartus í Sýrlandi.

Helsta hindrunarlausa siglingaleið Rússa út á heimshöfin er frá Kóla-skaga við austurhluta Noregs. Í kalda stríðinu var varnarlína gegn sovéska herflotanum dregin frá Grænlandi um Íslands til Skotlands (GIUK-hliðið).

Heimld: BBC