Mario Monti: Evrukreppan er að leiða til átaka sem geta splundrað Evrópu

Ítalskt dagblað birtir mynd af Angelu Merkel undir fyrirsögninni Fjórða ríkið

Mariano Rajoy, François Hollande, Mario Monti og Angela Merkel á fundi í Róm 22. júni 2012.

Mario Monti, forsætisráðherra Ítalíu varar við því í samtali við þýzka tímaritið Der Spiegel nú um helgina að evrukreppan sé að leiða til þjóðfélagslegra átaka í Evrópu, sem geti orðið til að sundra heimsálfunni og að ríki snúizt hvert gegn öðru. Andúð á Þýzkalandi fer að hans mati vaxandi á Ítalíu svo og gegn Evrópusambandinu og jafnvel Angelu Merkel sjálfri. Hann segir spennu í samskiptum ríkjanna vísa á sálræna splundun Evrópu. Í viðtalinu við Spiegel segist Monti hafa áhyggjur af þessari þróun og að ríkisstjórnir verði að leggja hart að sér að halda henni í skefjum.

Ítalskt dagblað, il Giornale, birti fyrir skömmu forsíðumynd af Angelu Merkel með uppréttar hendur undir fyrirsögninni: Fjórða ríkið (tilvísun til Þriðja ríkis Hitlers).

Romano Prodi, fyrrum forsætisráðherra Ítalíu og fyrrum forseti framkvæmdastjórnar ESB hefur skrifað grein í þýzka dagblaðið Bild, þar sem hann hvetur Þýzkaland til að sýna raunverulega forystu og segir Þjóðverja bera skyldu til að leiða meginlandið út úr kreppunni og til betri framtíðar. Hann segir að bregðist Þýzkaland þessari skyldu sinni þýði það pólitísk endalok Evrópu og Þýzkalands.

Í viðtalinu við Spiegel segir Monti að það sé lína í Evrópu á milli norðurs og suðurs og beggja megin hennar megi finna gagnkvæma fordóma.