Romney velur varaforsetaefni - ríkisfjármálin verða þungamiðja forsetakosningabaráttunnar

Mitt Romney, forsetaefni repúblíkana í Bandaríkjunum, hefur valið Paul D. Ryan, fulltrúardeildarþingmann frá Wisconsin, sem varaforsetaefni sitt. The New York Times (NYT) segir að með því að tilkynna þetta val sitt laugardaginn 11. ágúst hleypi Romney nýju lífi í kosningabaráttunna og bjóði kjósendum skýran kost af hálfu repúblíkana.

Paul Ryan

Romney valdi hafnarborgina Norfolk í Virginíu og stóð á bryggju við flugvélamóðurskipið Wisconsin þegar hann kynnti Ryan. Því var haldið leyndu þar til seint að kvöldi föstudags 10. ágúst að Ryan (42 ára) hefði orðið fyrir valinu. Opnuð var ný kosningasíða á netinu RomneyRyan.com, að morgni laugardags.

Litið er á Ryan sem vaxandi forystumann innan Repúblíkanaflokksins og nýtur hann mikils stuðnings meðal íhaldssamra baráttuhópa sem telja að hann sé eindreginn málsvari aðhalds í ríkisfjármálum. Ryan hefur setið í fulltrúadeild Bandaríkjaþings síðan 1999, aðeins 28 ára. Hann hefur því stundað stjórnmál frá Washington allan sinn pólitíska feril. Demókratar hafa hann að skotspæni sem dæmigerðan fulltrúa þeirra repúblíkana sem vilja skera niður útgjöld til velferðarmála.

Ryan hefur sem formaður fjárlaganefndar fulltrúadeildarinnar dregið skýrar línur varðandi opinber útgjöld og tekið afdráttarlausa afstöðu gegn útgjöldum Obama-stjórnarinnar til heilbrigðis- og félagsmála. Hann var lykilmaður í sigri repúblíkana í kosningum til fulltrúadeildarinnar árið 2010 og lagði flokki sínum til stefnu undir heitinu: „Vegvísir fyrir framtíð Ameríku“.

Fjárlagatillögur Ryans hafa orðið þungamiðja í forsetakosningabaráttunni. Demókratar gagnrýna þær fyrir ábyrgðarleysi. NYT segir að með því að velja Ryan vilji Romney enn herða á meginboðskap sínum um að ríkisfjármálin og efnahagsmál þjóðarinnar séu tekin nýjum íhaldssömum tökum.

Paul Ryan og Barack Obama hafa tekist harkalega á um stefnuna í efnahags- og ríkisfjármálum síðustu misseri. Í ræðu í Washington árið 2011 gagnrýndi Obama fjárlagatillögur Ryans í lykilræðum um efnahagsmál og sagði að í þeim fælist niðurskurður sem segði sér að Bandaríkjamenn hefðu ekki efni á að búa í því samfélagi sem hann vildi, þar væri dregin upp alltof svört mynd af framtíðinni.

Val Romneys á Ryan fellur vel að kröfum íhaldssamra afla innan flokks repúblíkana. Í leiðara The Wall Street Journal sagði fimmtudaginn 9. ágúst að með því að velja Ryan beindi Romney best athygli að því hvað væri í húfi í kosningunum. NYT segir að valið á Ryan sýni að Romney skori Obama í harðar umræður á komandi mánuðum. Forsetakosningarnar verða eftir þrjá mánuði.

BBC segir að með því að velja Ryan slái Romney á gagnrýni sem hann hafi sjálfur sætt fyrir að sýna ekki næga aðhaldssemi í opinberum útgjöldum þegar hann var ríkisstjóri í Massachusetts.