Steingrímur J. einangrast innan ráðherrahóps VG: Tveir ráðherrar krefjast endurskoðunar á stöðunni í ESB-aðildarferlinu

Tveir ráðherrar vinstri-grænna (VG), Katrín Jakobsdóttir, menningar- og menntamálaráðherra varaformaður VG, og Svandís Svavarsdóttir umhverfisráðherra sögðu við fréttastofu ríkisútvarpsins laugardaginn 11. ágúst að óvissa innan Evrópusambandsins hefði áhrif á ESB-aðildarferlið hér á landi, þá verði að endurskoða ákvörðun um aðildarumsóknina í ljósi komandi þingkosninga hér á landi. Vilja ráðherrarnir að ESB-málið sé tekið til endurskoðunar í viðræðum stjórnarflokkanna. Hafa nú allir ráðherrar VG nema Steingrímur J. Sigfússon áréttað að nauðsynlegt sé að ræða nýja stöðu í ESB-málum á vettvangi stjórnarflokkanna. Utanríkismálanefnd alþingis ræðir málið strax eftir helgi.

Katrín og Svandís hafa ásamt Steingrími J. Sigfússyni, formanni VG, og Árna Þór Sigurðssyni, formanni utanríkismálanefndar alþingis, til þessa farið að ósk Samfylkingarinnar í ESB-málinu og sagt að stjórnarsáttmálinn mæli fyrir um að ljúka beri aðildarviðræðunum í stað þess að nú sé lagt mat á aðildarferlið eða stöðuna í viðræðunum. Innan þingflokks VG hafa Ögmundur Jónasson, Jón Bjarnason og Guðfríður Lilja Grétarsdóttir lýst stuðningi við að sett verði tímamörk gagnvart ESB vegna aðildarviðræðnanna og málið borið undir þjóðina eins og það stendur þegar þeim mörkum er náð.

Þrír þingmenn sem kjörnir voru á þing á listum VG í kosningunum 2009 hafa sagt skilið við þingflokkinn ekki síst vegna ágreinings um ESB málið: Atli Gíslason, Ásmundur Einar Daðason og Lilja Mósesdóttir.

Flokksráð VG kemur saman til fundar eftir tvær vikur. Til þessa hafa ráðandi öfl í flokknum talið meiru skipta að fara að ósk Samfylkingarinnar um afstöðu til ESB í stað þess að setja fleyg í aðildarviðræðurnar. Steingrímur J. Sigfússon hefur sem ráðherra forræði þeirra mála sem helst er talið að valdi ágreiningi gagnvart ESB: sjávarútvegsmála, landabúnaðarmála og afnáms gjaldeyrishaftanna.

Á ruv.is laugadaginn 11. ágúst segir að „mjög aukinn stuðningur“ sé innan þingflokks VG „við að endurmeta aðildarumsókn Íslands að Evrópusambandinu“. Forsendur þyki hafa breyst og vilji sé fyrir því að taka málið upp á alþingi á ný. Utanríkismálanefnd þingsins muni hitta samninganefnd Íslands gagnvart ESB mánudaginn 13. ágúst og ræða stöðu aðildarviðræðnanna. Í þingflokki VG „þyki mönnum óþægilegt að hefja kosningaveturinn með málið í þeim farvegi sem það er nú“.

Katrín Jakobsdóttir, varaformaður VG, segir eina forsendu VG í málinu hafa verið að þjóðin hefði aðkomu að málinu. Ríkisútvarpið vitnar orðrétt í Katrínu: „Það er líka ljóst að forsendur í Evrópu hafa breyst, efnahagslegar og pólitískar líka. Það er mikil óvissa hvert Evrópusambandið stefnir. Það er ljóst að þessi óvissa þar hefur talsverð áhrif á þetta ferli hér á landi.“ Hún segir einnig að málið hafi verið rætt í VG „en fyrst og fremst sé þetta mál sem stjórnarflokkarnir þurfi að ræða sín á milli og fara yfir heildstætt,“ segir á ruv.is.

Þá segir á ruv.is:

„Katrín segir að það sé ekki sérstakt kappsmál Vinstri grænna að Ísland fari inn í ESB. “Það hafa verið hugmyndir uppi um það hjá ýmsum að setja málið á ís, þjóðin fái aðkomu að því hvort halda eigi áfram með málið, eða hvort draga eigi umsóknina til baka og hætta við málið. Eða jafnvel halda málinu áfram óbreyttu og ljúka því með þjóðaratkvæðagreiðslu. Þannig að það eru auðvitað margar leiðir sem hægt er að fara og það eru ýmsar skoðanir á því,„ segir Katrín. Umræðan sé ekki komin á það stig að hægt sé að lýsa einhverri sérstakri leið og líka betur á því að ræða þetta við samstarfsflokkinn beint en í fjölmiðlum.“

Ríkisútvarpið segir að Svandís Svavarsdóttir telji „að endurskoða þurfi ákvörðun um aðildarumsóknina. Einboðið sé að endurmeta þurfi stöðuna í aðdraganda kosninganna, vegna tímaássins og stöðumál í Evrópu meðal annars“

Svandís Svavarsdóttir segir á ruv.is:

„Þannig að Vinstri hreyfingin grænt framboð hlýtur sem flokkur að þurfa að ræða það innan sinna raða hvaða nálgun er best í slíkri endurskoðun og það er rakið að gera það á flokksráðsfundinum nú í lok mánaðarins. Og í framhaldinu tel ég rétt að fara ítarlega yfir málið í samstarfsflokknum í ljósi þessara breyttu forsendna frá árinu 2009. [...]

En ég árétta það að VG verður að fara yfir þessi mál innan sinna raða og þar eru allir möguleika uppi á borðinu. Í framhaldinu tel ég rétt að við förum yfir málið með samstarfsflokknum.“