Ítalía: Smygl á verðmætum úr landi stóreykst - peningahundar þefa uppi smyglara á flugvöllum

Efnahagsbrotalögregla Ítalíu skýrði frá því laugardaginn 11. ágúst að hún hefði aldrei fyrr gert jafnmikið upptækt af reiðufé, gulli og silfri sem flytja átti ólöglega úr landi. Alls hefur lögreglan á þessu ári lagt hald á vermæti sem virt eru á 41 milljarð evra í höfnum og flughöfnum landsins, er það 78% aukning á einu ári.

Úr flugstöðinni í Róm.

Frá upphafi þessa árs hefur ítalska efnahagsbrotalögreglan ekki aðeins lagt hald á mikið magn reiðufjár sem eigendur reyndu að flytja ólöglega úr landi heldur einnig 88 kg af gulli (45 kg árið 2011) og 570 kg af silfri (170 kg á sama tíma árið 2011). Að ítölskum lögum ber að tilkynna ef menn ætla að flytja úr landi meira en 10.000 evrur í reiðufé eða dýrum málmum. Lögreglan telur að fjölgun afbrota á þessu sviði megi rekja til hækkunar á sköttum á Ítalíu, breytinga á efnahagsástandi og tilrauna til peningaþvættis.

Í skýrslu lögreglunnar er sagt frá ýmsum atvikum úr starfi hennar. Á flugvellinum Rome-Fiumicino var kínverskur maður handtekinn með sígarettupakka sem fylltir voru með 500 evru seðlum, alls 200.000 evrur. Þá hafði Ítali sem stundar viðskipti í Eþíópíu falið 122.000 evrur í ferðatösku með tvöföldum botni.

Eigandi matvöruverslunar í Varese, skammt frá Mílanó, var tekinn í landamærastöðinni Ponte Chiasso á leið til Sviss þegar hann fór þar um ásamt dóttur sinni og 50 kg af gulli sem hann hafði falið undir barnastólnum.

Lögreglan hefur þjálfað hunda, peningahunda, til að þefa uppi peningaseðla og mynt. Tango, labrador-hundur, í flugstöðinni í Mílano-Malpensa fann 424.000 evrur faldar í fatatösku í eign Sri Lanka-manns. Bróðir Tangos, Cash, leiddi lögregluna að eftirlaunaþega sem vildi laumast með 242.000 evrur úr landi.