WSJ: Finnar í verri stöðu en Svía og Danir vegna evrunnar

Finnar eru í verri stöðu efnahagslega en Svíþjóð og Danmörk vegna þess, að Finnar eru eina þjóðin af þessum þremur, sem hafa tekið upp evru að sögn Wall Street Journal. Blaðið segir að af þessum sökum séu Finnar að dragast aftur úr frændþjóðum sínum tveimur.

WSJ segir að Finnar geti bent á hóflega skuldsetningu, takmarkað atvinnuleysi og aukin pólitísk áhrif í umræðum um aðstoð við ríki Suður-Evrópu en þrátt fyrir þetta sjáist merki um að efnahagsvöxturinn sé að hægja á sér í Finnlandi.

Blaðið bendir á, að hagvöxtur í Svíþjóð hafi orðið um 1,4% á öðrum fjórðungi ársins. Finnar búi við bezta lánshæfismat, sem í boði er ásamt Sviþjóð, Danmörku og Noregi en munurinn sé sá,að Finnar séu nú bundnir við að hjálpa Grikklandi, Ítalíu og Spáni. Þetta valdi pólitískum deilum í Finnlandi, sem ekki séu til staðar í hinum löndunum þremur og sé orðin byrði á finnsku efnahagslífi.

Blaðið vísar til ummæla Jyrki Katainen, forsætisráherra um að enginn geti verið ánægður með neyðarlánapakkann og að hann viðurkenni að vandamál annarra evruríkja séu farin að hafa áhrif á stöðu Finna. Ný könnun í Finnlandi bendir til að 66% Finna vilji forðast að taka á sig frekari skuldbindingar vegna annarra evruríkja. Á sama tíma vill ríkisstjórnin auka skatta og skera niður útgjöld, sem samtals nemi um 4% af fjárlögum finnska ríkisins.

Námsmaður í Finnlandi sem WSJ talar við segist frekar vilja hjálpa þurfandi fólki í Finnland en í öðrum löndum.

Sannir Finnar eru að ná sér á strik á ný í skoðanakönnunum. Leiðtogi flokksins Timo Soini vill láta skoða möguleikann á að yfirgefa evrusvæðið og bendir á sterkari stöðu þeirra Norðurlandaþjóða, sem standi utan við evruna.