Starfsmaður Deloitte í Bandaríkjunum fyrirfór sér-Fjölskyldan tengir lát hans máli Standard Chartered

Háttsettur starfsmaður Deloitte, endurskoðunarfyrirtækisins í Bandaríkjunum framdi sjálfsmorð, sem fjölskylda hans tengir ákærum á hendur Standard Chartered bankanum vestan hafs. Um er að ræða Daniel Pirron, sem fannst látinn í bíl í bílastæðahúsi skammt frá heimili hans í Connecticut. Hinn 6. ágúst sl. lagði fjármálaeftirlit New York ríkis og Connecticut fram ásökun á hendur Deloitte fyrir að hafa aðstoðað Standard Chartered við að villa um fyrir yfirvöldum vegna viðskipta við Íran. Sjö dögum síðar fyrirfór Pirron sér

Daily Telegraph segir frá málinu og segir að bróðir Pirron, Mike, hafi sagt opinberlega að fjölskyldan tengi þessi tvö mál saman. Daniel Pirron hafi varað dætur sínar við daginn áður að það væru mikil vandamál framundan. Mike segir bróður sinn ekki hafa rætt málið við sig en sagt að það væru mikil vandamál tengd þessu máli í London. Hann hafi greinilega verið kvíðinn vegna málsins þegar það kæmi fram. Um of margar tilviljanir sé að ræða. David hafi starfað í lögfræðideildinni, hann hafi farið til London. Hann hafi sagt fyrirtækið vera undir miklum þrýstingi. Hann hafi verið með dóttur sinni daginn áður,, hún hafi sagt hann vera kvíðinn og hann hafi alltaf verið að fara á blaðasölu til þess að sjá hvort einhver frétt hefði komið sem tengdist Deloitte.

Fjölskyldan hefur ráðið lögfræðing til þess að reyna að endurheimta fartölvu Davids sem Deloitte neitar að afhenda. Fyrirtækið segir að David Pirron hafi ekkert haft með mál Standard Chartered að gera.