Evru-kreppan: Slegið á bjartsýni á mörkuðum - evran lækkar að nýju - Grikkir geta ekki vænst neins

Þjóðverjar slógu mánudaginn 20. ágúst á vonir um að Seðlabanki Evrópu (SE) mundi grípa til öflugra aðgerða í því skyni að lækka lántökukostnað innan evru-svæðisins og höfnuðu öllum vangaveltum um að þáttaskil yrðu í vikunni í leitinni að bráðaleið út úr skuldavanda Grikkja.

Viðskipti á mörkuðum báru þess merki að morgni mánudags 20. ágúst að menn tryðu því sem sagði í Der Spiegel um helgina að SE hefði á prjónunum áform um að leggja fram fjármuni til að létta undir með skuldsettum ríkjum. Spiegel nefndi enga heimildarmenn fyrir frétt sinni um að SE mundi hefja kaup á ríkisskuldabréfum á fjármálamörkuðum til að aðstoða Spánverja og Ítali og draga úr vangaveltum um upplausn evru-samstarfsins.

Martin Kotthaus, upplýsingafulltrúi hjá Wolfgang Schäuble, fjármálaráðherra Þýskalands, batt snarlega enda á alla bjartsýni á mörkuðum. Hann sagðist ekki vita um neitt sem staðfesti fréttina í Der Spiegel.

Frá SE sem lætur mjög sjaldan í sér heyra vegna frétta fjölmiðla bárust þau boð að það væri „einfaldlega fráleitt að segja frá ákvörðunum sem hefðu ekki enn verið teknar“. Það væri einnig rangt að hafa uppi getgátur um til hvaða ráða SE kynni að grípa í framtíðinni.

Eftir þessi ummæli talsmanns SE lækkaði risið á mörkuðunum og gengi evrunnar lækkaði að nýju gagnvart dollar eftir dálitla hækkun fyrr um daginn.

Þá varð það ekki til að styrkja evruna að þau boð bárust frá hinum valdamikla Seðlabanka Þýskalands að hann væri eins og áður andvígur áformum sem Mario Draghi, forseti bankastjórnar SE, kynnti fyrir nokkru um að bankinn mundi aðstoða ríki sem leituðu á náðir ESB.

Antonis Samaras, forsætisráðherra Grikklands, á bókaðan fund hjá Angelu Merkel Þýskalandskanslara, í Berlín föstudaginn 24. ágúst og daginn eftir hjá Françcois Hollande Frakklandsforseta í París. Hann ætlar að ræða við þau tveggja ára frestun aðhaldsaðgerða í Grikklandi.

Steffen Seibert, talsmaður Merkel, varaði fjármálamenn og miðlara við að binda of miklar vonir við þessa fundi.

„Ég get sagt ykkur að þess er ekki að vænta að skýr afstaða verði mótuð eða teknar verði afdrifaríkar ákvarðanir. Það gerist ekki,“ sagði Seibert um fundina tvo. „Skýrsla þríeykisins verður lögð til grundvallar við allar ákvarðanir.“

Þessi skýrsla fulltrúa ESB, SE og Alþjóðagjaldeyrissjóðsins er væntanleg í september.

Heimild: AFP