Monti ætlar ekki í framboð en er fús til að starfa áfram sem forsætis­ráðherra í þágu stefnumála sinna

Mario Monti

Mario Monti, starfandi forsætisráðherra Ítalíu, sagði sunnudaginn 23. desember að hann væri fús til að halda áfram sem forsætisráðherra á næsta ári. Hann sagðist hins vegar ekki ætla að bjóða sig fram í þingkosningunum sem efnt verður til undir lok febrúar 2013. Monti var í nóvember 2011 fenginn til að leiða ríkisstjórn Ítalíu sem embættismaður með reynslu af ESB-málum og vegna hagfræðimenntunar sinnar. Hann hefur aldrei hlotið kjör á þing.

Monti efndi til blaðamannafundar sunnudaginn 23. desember og fór yfir stöðu mála undir lok ársins. Hann sagðist hafa meiri áhuga á að stefnu sinni yrði fylgt áfram en að bjóða sig fram til þings, það væri ekki á dagskrá sinni.

Þótt Monti segðist ekki verða í framboði sem þingmaður gaf hann ótvírætt til kynna að hann yrði fús til að gegna áfram embætti forsætisráðherra fengi hann til þess nægan stuðning innan þingflokka að kosningum loknum.

Monti sagðist ekki taka afstöðu með neinum stjórnmálaflokkanna. Hann væri hins vegar til þess búinn að axla áfram ábyrgð á stjórn landsins. Monti hefur ekki tekið af skarið á þennan hátt áður en hann baðst lausnar fyrir sig og ráðuneyti sitt föstudaginn 21. desember. Lýsti einhver flokkur eða samsteypa flokka stuðningi við sannfærandi stefnu sem hann styddi „mundi ég verða fús til að vinna að framgangi málsins, veita ráð og forystu ef nauðsyn krefði,“ sagði hann.

Monti lýsti þeirri von að á bak við næstu ríkisstjórn yrði rúmur meirihluti þingmanna og hann sagðist telja að með hefðbundinni skiptingu milli hægri og vinstri tækist mönnum ekki að sigrast á þeim vanda sem blasti við Ítölum.

Forsætisráðherrann fráfarandi fór þungum orðum um Slivio Berlusconi, forvera sinn, og hafnaði boði hans um að taka við forystu meðal ítalskra íhaldsmanna. Hann varaði kjósendur einnig við að falla fyrir lýðskrumi Berlusconis og loforðum hans um að lækka skatta á tímum mikils ríkisfjármálavanda Ítalíu.