Kýpur: Fjármála­ráðherrann hafnar hugmynd um að ganga á innistæður sparifjár­eigenda

Ríkisstjórn Kýpur hefur lýst eindreginni andstöðu við hugmyndir um að innistæðueigendur taki á sig tap vegna vandræða banka á eyjunni. Hugmyndum um þetta hefur verið hreyft til að ýta við þeim sem leita leiða til að koma til móts við óskir ríkisstjórnarinnar um neyðarlán frá ESB og Alþjóðagjaldeyrissjóðnum.

Michael Sarris

Michael Sarris, fjármálaráðherra Kýpur, hafnaði föstudaginn 1. mars öllum tillögum um að gengið yrði á eignir innistæðueigenda til að greiða fyrir viðræðum um alþjóðlegt neyðarlán til Kýpverja.

„Ég segi skýrt og afdráttarlaust að ekki er unnt að hugsa sér heimskulegri ráðagerð, þá tala ég ekki aðeins um stöðuna hér á Kýpur heldur um heim allan og innan evru-svæðisins,“ sagði Sarris á blaðamannafundi.

Skuldbindingin sem um er að ræða á Kýpur til að bjarga bönkunum þar nemur 17 milljörðum evra eða álíka fjárhæð og sem nemur öllu hagkerfi landsins, velta menn fyrir sér hvort Kýpverjar geti nokkru sinni staðið undir því að greiða þessas skuldir.

Því hafði verið hreyft að létta mætti á vandanum með því að þeir sem ættu meira en 100.000 evrur (16,6 m. ISK) í kýpverskum bönkum tækju á sig afskrift hluta inneignarinnar ef bjarga ætti banka þeirra.

Sarris viðurkenndi að markmið tillögunnar hefði verið að gera þjóðinni fært að standa undir skuldum sínum en lagði áherslu á að aðrar leiðir væru færar til að ábyrgjast endurgreiðslu á neyðarláni.

Hann sagði að meðal annars mætti selja ákveðin ríkisfyrirtæki en til þess þyrfti tíma. Kýpverjar hafa beðið í átta mánuði eftir svari við beiðni sinni um neyðarlán. Hún verður að líkindum á fundi fjármálaráðherra evru-ríkjanna mánudaginn 4. mars en stefnt mun að ákvörðun ráðherranna fyrir lok mars.